अजम्बर पुलामी-
बेलका, साउन २४ / उदयपुरको बेलका नगरपालिकामा ‘सुरक्षित सडक अभियान’ सुरु गरिएको छ। मदन भण्डारी राजमार्गमा बढ्दै गएको सडक दुर्घटना न्यूनीकरण गर्ने उद्देश्यले बेलका नगरपालिका-९ स्थित माछापुच्छ्रे सामुदायिक वन क्षेत्रमा अभियान सञ्चालन गरिएको हो।
अभियानका क्रममा राजमार्गमा गुडिरहेका यात्रु तथा चालकलाई केहीबेर रोकेर सडक दुर्घटनाका कारण, ट्राफिक नियमको पालना तथा सुरक्षित यात्राका उपायबारे सचेतना गराइएको थियो।
अभियानमा अभियन्ता रमा मगर, जिल्ला ट्राफिक कार्यालय प्रमुख दानबहादुर मिरिङचिङ, बेलका नगरपालिका-९ का वडाध्यक्ष भरत घिमिरे, नेकपा एमाले बेलका नगर कमिटी अध्यक्ष हिराजङ राई, पत्रकारलगायतको सहभागिता रहेको थियो।
अभियानमार्फत चालक तथा यात्रुलाई ओभरस्पिड, ओभरलोड र जथाभावी ओभरटेक नगर्न, ट्राफिक नियमको पालना गर्न तथा अत्यधिक दुर्घटना हुने क्षेत्रमा विशेष सतर्कता अपनाउन आग्रह गरिएको छ। साथै, सडकमा राखिएका ट्राफिक संकेत तथा सतर्कता सन्देशलाई ध्यान दिन र लामो यात्राका क्रममा समय मिलाएर आराम गर्नसमेत अनुरोध गरिएको छ।
अभियानका आयोजकले मदन भण्डारी राजमार्गमा हुने दुर्घटना न्यूनीकरणका लागि सरकार, समुदाय, चालक तथा यात्रु सबैको साझा भूमिका आवश्यक रहेको भन्दै सुरक्षित सडकसम्बन्धी सन्देशलाई व्यापक बनाउन आग्रह गरेका छन्।
