०३ श्रावण,बेलका / उदयपुरको बेलका नगरपालिका–८ स्थित भाइरल बोप्ताङ डाँडामा आज शनिबार सरसफाइ गरिएको छ।
नगरप्रमुख अशोक कार्कीको नेतृत्वमा सम्पन्न सरसफाइ कार्यक्रममा वडा नं. ८ का अध्यक्ष जयकुमार राई, वडा नं. ९ का अध्यक्ष भरत घिमिरे, वडा नं. ३ का अध्यक्ष टंक आचार्य, एपीएफ (सशस्त्र प्रहरी) टोली, नेपाल प्रहरी, वडा नं. ८ का वडा सदस्यहरू, पर्यटन समिति, होटल व्यवसायी संघ, टोल सुधार समिति र स्थानीय बासिन्दाहरूको सहभागिता रहेको थियो।
पछिल्लो समय सामाजिक सञ्जाल, विशेषगरी टिकटकमा भाइरल बनेपछि दैनिक १५ सयभन्दा बढी आन्तरिक पर्यटक पुग्ने बोप्ताङ डाँडामा फोहोर बढ्दै गएपछि सरसफाइ अभियान सञ्चालन गरिएको हो।
कार्यक्रमका क्रममा बोप्ताङ क्षेत्रलाई सफा र व्यवस्थित बनाउने, पैदलमार्ग सुधार गर्ने, र पर्यटन पूर्वाधार विस्तार गर्ने विषयमा समेत छलफल गरिएको छ।
वडा नं. ८ का अध्यक्ष जयकुमार राईले बोप्ताङ डाँडामा छिट्टै शौचालय, पार्किङ र अन्य आवश्यक संरचना व्यवस्थापन गर्दै जाने प्रतिबद्धता जनाउनुभयो। साथै पर्यटकीय क्षेत्रको दीर्घकालीन व्यवस्थापनका लागि अन्य विविध पूर्वाधार पनि निर्माण गरिने उहाँले जानकारी दिनुभयो।
नगरपालिकाले बोप्ताङ डाँडालाई दिगो र व्यवस्थित पर्यटकीय गन्तव्य बनाउने योजना अघि बढाइरहेको जनाएको छ।
