१७ साउन, बेलका / सहयोगी बचत तथा ऋण सहकारी संस्था लि., बेलका नगरपालिका ९ रामपुरको आयोजनामा एक दिने निशुल्क स्वास्थ्य शिविर सम्पन्न भएको छ। सहकारीको कार्यालय प्राङ्गणमा सम्पन्न उक्त शिविरमा मुटु रोगी कल्याण मञ्च धरान, नोबेल मेडिकल एण्ड टिचिङ अस्पताल विराटनगर र विराट रानी आँखा अस्पताल विराटनगरको प्राविधिक सहयोग रहेको थियो।
शिविरमा उच्च रक्तचाप, मधुमेह, मुटु तथा आँखासम्बन्धी रोगको परीक्षण गरिएको थियो । सहकारीका व्यवस्थापक तेजबहादुर खड्काका अनुसार रामपुर र आसपासका क्षेत्रका करिब ३४८ जनाले स्वास्थ्य परीक्षण गराई सेवा लिएका थिए।
शिविरमा वरिष्ठ फिजिसियन तथा छाती-मुटुरोग विशेषज्ञ डा. खालिद हुसेन हक, नोबेल मेडिकल कलेजका निर्देशक तथा वरिष्ठ मुटुरोग विशेषज्ञ डा. राजेश नेपालसहितको मेडिकल टोली र विराट रानी आँखा अस्पतालका प्रशासन प्रमुख रामकुमार पण्डितको उपस्थितिमा सेवा सञ्चालन गरिएको थियो।
स्थानीय बासिन्दाले यस्तो किसिमको स्वास्थ्य शिविरले ग्रामीण क्षेत्रका सर्वसाधारणलाई गुणस्तरीय स्वास्थ्य सेवा प्राप्त गर्न सहज हुने बताएका छन्।
