१८ साउन, बेलका / उदयपुर जिल्लाको रौतामाई गाउँपालिका-७ मा पर्ने मुर्कुचिको जंगलमा बेलका नगरपालिका-१ आम्बासी निवासी मचिन्द्र बिष्ट रहस्यमय अवस्थामा मृत फेला परेका छन्।
शनिबार दिउँसो स्थानीय बासिन्दाले बिष्टलाई रुखमा आफ्नै टी-शर्टको डोरी प्रयोग गरी झुन्डिएको अवस्थामा फेला पारेका थिए। तर घटनास्थलको अवस्था, शरीरमा देखिएको चोटपटक, निलडाम र मुखको अगाडिका दुई दाँत भाँचिएको अवस्थामा शव भेटिएकोले आत्महत्याको आशंका कमजोर भएको छ।
साथै, झुन्डिएको भनिएपनि मृतकको घाँटीमा डोरीको सामान्य झुन्डिएको डाम समेत नदेखिनु र परिवारलाई घटना भएको केही समयपछि मात्रै जानकारी गराइनुले घटनालाई झनै रहस्यमय बनाएको हो।
पेशाले ट्र्याक्टर चालक रहेका बिष्ट केही समयदेखि चितवनमा अस्थायी रूपमा बस्दै आएका थिए भने केही दिनअघि मात्रै आफ्ना ससुराली पक्षसँग भेटघाट गर्न मुर्कुची गएका थिए।
मृतकका आफन्त तथा स्थानीयवासीहरूले यो घटना आत्महत्या नभई हत्या भएको हुनसक्ने आशंका व्यक्त गरेका छन्। यद्यपि घटनाको कारण पत्ता लगाउन पोष्टमार्टम रिपोर्टको पर्खाइ गरिएको छ।
