चैत २,बेलका । संयुक्त दलित एकता समाज बेलका नगर समितिले १६ वर्षीय दलित किशोरी इनिसा बि.क. माथि भएको बलात्कारपछि गरिएको जघन्य हत्याको घटना प्रति गम्भीर ध्यानाकर्षण गराउँदै बेलका नगरपालिकामा पनि नगरप्रमुख अशोक कार्कीलाई ज्ञापनपत्र बुझाएको छ।
बेलका नगरपालिकामा समाजका अध्यक्ष उमेश बिश्वकर्मा लगायत प्रतिनिधिहरूले नगरप्रमुख कार्कीलाई ज्ञापनपत्र बुझाउँदै घटनामा संलग्न दोषीलाई यथाशीघ्र पहिचान गरी कडा कानुनी कारबाही गर्न माग गरेका छन। पीडित किशोरी गुर्भाकोट नगरपालिका–६, सुर्खेत जिल्ला स्थायी घर भई हाल बिरेन्द्र नगर–१ मा बसोबास गर्दै आएकी थिइन।
ज्ञापनपत्रमा पीडित परिवारलाई छिटो न्याय दिलाउन तथा यस्ता अमानवीय घटनाको पुनरावृत्ति हुन नदिन राज्यका सम्बन्धित निकायले प्रभावकारी कदम चाल्नुपर्ने माग गरिएको छ। साथै, दलित समुदायमाथि हुने विभेद, हिंसा र अत्याचार अन्त्यका लागि सबै पक्ष जिम्मेवार र संवेदनशील बन्नुपर्नेमा जोड दिइएको छ।
ज्ञापनपत्र बुझ्दै बेलका नगरपालिकाका नगरप्रमुख अशोक कार्कीले घटनाप्रति गहिरो दुःख व्यक्त गर्दै दोषीमाथि कडा कानुनी कारबाही हुनुपर्ने र पीडित परिवारलाई न्याय दिलाउन सबै पक्ष एकजुट हुनुपर्ने धारणा व्यक्त गर्नुभएको छ।
