रमेश तिम्सिना,
भदौ ११, बेलका /उदयपुर र सुनसरीको सीमावर्ती क्षेत्रमा पर्ने श्रीलंका टप्पुमा भइरहेको कोशी नदी कटान नियन्त्रणका लागि कोशी प्रदेश सरकारले तत्काल १ करोड रुपैयाँ बजेट विनियोजन गर्ने भएको छ।
बिहीबार श्रीलंका टप्पुको सुनसरीस्थित वराहक्षेत्र नगरपालिका-६ र ९ क्षेत्रमा कोशी कटानको स्थलगत अवलोकन गर्दै कोशी प्रदेशका मुख्यमन्त्री हिक्मतकुमार कार्कीले पहिलो चरणमा ५० लाख र दोस्रो चरणमा थप ५० लाख रुपैयाँ गरी तत्काल १ करोड रुपैयाँ विनियोजन गरेर काम अघि बढाइने बताउनुभएको हो।
मुख्यमन्त्री कार्कीले कोशी कटान नियन्त्रणका लागि आवश्यक नीतिगत निर्णयसँगै बजेट, जनशक्ति र प्राविधिक सहयोग उपलब्ध गराउने प्रतिबद्धता जनाउनुभयो। उहाँले नेपाली सेना, सशस्त्र प्रहरी र नेपाल प्रहरीसँग समन्वय गरी आवश्यक जनशक्ति परिचालन गरिने पनि बताउनुभयो।
कोशी सम्झौताअनुसार कटान प्रभावित क्षेत्र भारतीय क्षेत्राधिकारसँग समेत जोडिएकाले भारतीय पक्ष र भारतीय राजदूतावासमार्फत आवश्यक कूटनीतिक पहल गर्नुपर्ने मुख्यमन्त्री कार्कीको भनाइ छ।
अवलोकनका क्रममा वराहक्षेत्र र बेलका नगरपालिकाका नगरप्रमुख, प्रदेशका मन्त्री तथा प्रदेशसभा सदस्य, पूर्वमुख्यमन्त्री, इन्जिनियर र प्राविधिकसहितको टोली श्रीलंका टप्पु पुगेको थियो।
यसैबीच, श्रीलंका टप्पुको चिलिया क्षेत्रमा कोशी तथा बक्राहा नदी व्यवस्थापन कार्यालय विराटनगरले गरेको नदी नियन्त्रणको कामप्रति स्थानीयले प्रश्न उठाएका छन्।
कार्यालयका अनुसार करिब २० लाख रुपैयाँको लागतमा २ सय मिटर बोराबाँध र बाँसको पाइलिङ गरिएको छ। तर स्थानीयले भने काममा ठूलो मात्रामा जनश्रमदान भएको र खर्च तथा कामको विवरणप्रति आफूहरू सन्तुष्ट नरहेको गुनासो गरेका छन्।
स्थानीय नन्दकिशोर मेहेताले १९० घना बाँसको मात्रै भुक्तानी भएको अवस्थामा मुचुल्कामा ४५० घना बाँस उल्लेख गरिएको भन्दै कामको पारदर्शितामाथि प्रश्न उठाउनुभएको छ।
कार्यालय प्रमुख चक्रविक्रम सिंहले काम सम्पन्न भइसकेकाले सामाजिक परीक्षण गरिने बताउनुभएको छ।
कोशी कटान नियन्त्रणका लागि वराहक्षेत्र र बेलकाका स्थानीय बासिन्दाले गत असार ५ गतेदेखि निरन्तर जनश्रमदान गर्दै आएका छन्।
