कतार, साउन १७ / श्रम संस्कृति महा-अभियान कतारद्वारा आयोजित “संस्थागत आधारभूत आन्तरिक प्रशिक्षण कार्यक्रम-२०२६” शुक्रबार कतारको सनैया प्लाजा मलस्थित सेन्चुरी रेस्टुरेन्टको सभा हलमा सम्पन्न भएको छ।
संस्थाका अध्यक्ष शुक्रकुमार राई (सुबास) को सभापतित्व तथा प्रमुख सल्लाहकार गजेन्द्र राई को प्रमुख आतिथ्यमा सम्पन्न कार्यक्रममा विशेष सल्लाहकार पदमबहादुर राई, सल्लाहकारहरू, समाजसेवी, शुभेच्छुक, कार्यसमिति, क्षेत्रीय तथा विभागीय समिति, विभिन्न उपसमिति र अभियानमा आबद्ध ११० भन्दा बढी श्रमदाताको उल्लेखनीय सहभागिता रहेको थियो।
“प्रकृति, संस्कृति र प्रविधिको सन्तुलन, परिष्कृत समाजका लागि श्रम अभियान” भन्ने मूल नारासहित दीप प्रज्वलन र ब्यानर अनावरण गरेर कार्यक्रमको उद्घाटन गरिएको थियो। वरिष्ठ उपाध्यक्ष भाईकाजी गुरुङले स्वागत मन्तव्य व्यक्त गरेका थिए।
कार्यक्रममा नेपाली राष्ट्रिय गान तथा श्रमपिता हर्क साम्पाङ राईको देशभक्तिपूर्ण गीत प्रस्तुत गरिएको थियो भने शहीदहरूको सम्मानमा एक मिनेट मौनधारण गरिएको थियो। द्वितीय उपाध्यक्ष नवीन थापाले संस्थागत परिचय तथा प्रशिक्षण कार्यक्रमको उद्देश्यबारे जानकारी गराएका थिए।
संस्थागत प्रक्रिया, कार्यप्रणाली तथा आधारभूत विषयमा जानकारी दिने उद्देश्यले आयोजित प्रशिक्षणमा सल्लाहकार रबिन शेर्पाले संस्था, उद्देश्य र महत्त्व, सल्लाहकार डीएन मगरले संस्थाको संरचना, कार्यप्रणाली तथा अधिकार-कर्तव्य, प्रवक्ता पदम गुरुङले अनलाइन सदस्यता विस्तार र प्रयोग, नेपालबाट जुममार्फत सूचना तथा प्रविधि प्रमुख करुण राईले संस्थाको एप तथा प्रविधिको प्रयोग, र महासचिव एकराज राईले हर्कवाद, राष्ट्रिय एजेन्डा तथा राजनीतिक सिद्धान्तका विषयमा सहजीकरण गरेका थिए।
प्रशिक्षणपछि प्रश्नोत्तर कार्यक्रम सञ्चालन गरी सही उत्तर दिने सहभागीलाई सान्त्वना पुरस्कार प्रदान गरिएको थियो। सहभागीहरूले प्रशिक्षणबाट प्राप्त ज्ञान र यसको महत्त्वबारे आफ्ना धारणा राखेका थिए। कार्यक्रममा गायक दिपेस पायल राईले सांगीतिक प्रस्तुति पनि दिएका थिए।
समापन समारोहमा सल्लाहकार तथा आमन्त्रित अतिथिहरूले प्रशिक्षणको प्रभावकारिताबारे धारणा राखेका थिए। प्रमुख अतिथि गजेन्द्र राईले यस्ता ज्ञानमूलक कार्यक्रमले श्रमदाताहरूलाई थप सक्षम बनाउने उल्लेख गर्दै आगामी दिनमा अझ प्रभावकारी रूपमा निरन्तर सञ्चालन गर्नुपर्ने धारणा व्यक्त गरे।
अन्त्यमा अध्यक्ष शुक्रकुमार राईले उपस्थित सम्पूर्णलाई धन्यवाद ज्ञापन गर्दै कार्यक्रम समापन गरेका थिए। कार्यक्रमको सञ्चालन महासचिव एकराज राई र उपमहासचिव दुर्गा बहादुर गुरुङले संयुक्त रूपमा गरेका थिए।
