२३ बैशाख, बेलका / उदयपुरको बेलका नगरपालिकाले भूमिहीन दलित, भूमिहीन सुकुम्बासी तथा अव्यवस्थित बसोबासीहरूको समस्या समाधानका लागि प्रक्रिया तीव्र बनाएको जनाएको छ। नगर कार्यपालिकाको कार्यालयले जारी गरेको विज्ञप्तिअनुसार विभिन्न निकायसँग समन्वय गरी जग्गा व्यवस्थापन तथा लालपुर्जा वितरणको काम अघि बढाइएको हो।
जिल्ला प्रशासन कार्यालय उदयपुर तथा संघीय मामिला तथा सामान्य प्रशासन मन्त्रालयसँगको पत्राचारपछि नगरपालिकाले सम्बन्धित कार्यालयहरूलाई आवश्यक विवरण उपलब्ध गराउँदै नागरिकको जानकारीका लागि सार्वजनिक सूचना जारी गरेको जनाएको छ।
नगरपालिकाका अनुसार क्षेत्रभित्रका सार्वजनिक तथा सरकारी जग्गामध्ये ठूलो हिस्सा ऐलानी तथा उपयोगविहीन अवस्थामा रहेकाले लामो समयदेखि बसोबास गर्दै आएका नागरिकहरूलाई व्यवस्थापन गर्ने प्रयास भइरहेको छ। सो क्रममा भूमिहीन दलित, सुकुम्बासी तथा अव्यवस्थित बसोबासीहरूको लगत संकलन, नापी तथा प्रमाणीकरण कार्य अघि बढाइएको छ।
हालसम्म सयौँ निवेदन संकलन भई दर्ता प्रक्रिया अगाडि बढाइएको छ भने केही वडाहरूमा डिजिटल नापीसमेत सम्पन्न भइसकेको छ। नगरपालिकाले दिएको जानकारीअनुसार विभिन्न वडामा भूमिहीन दलित तथा सुकुम्बासी परिवारलाई आवास प्रयोजनका लागि जग्गा धनी प्रमाणपत्र वितरण गर्ने तयारी अन्तिम चरणमा पुगेको छ।
त्यसैगरी, अव्यवस्थित बसोबासीहरूको हकदाबी सम्बन्धी सूचना प्रकाशन भई उनीहरूको जग्गा व्यवस्थापन तथा लालपुर्जा तयारीका लागि भूमि आयोगमा फाइल पेश गर्ने प्रक्रिया जारी रहेको छ।
नगरपालिकाले ४० वर्षभन्दा बढी समयदेखि ऐलानी, पर्ति तथा नदी उकास जग्गामा बसोबास गर्दै आएका नागरिकहरूको स्थायी व्यवस्थापन गर्ने लक्ष्य राखेको छ। साथै, सार्वजनिक तथा सरकारी जग्गामा बनेका संरचनाहरूको व्यवस्थापनसमेत कानुनी प्रक्रिया अनुसार अघि बढाइने जनाएको छ।
नगर प्रमुखले नगरवासीलाई दीगो बसोबास सुनिश्चित गर्न जग्गा धनी प्रमाणपत्र उपलब्ध गराउनेतर्फ नगरपालिका प्रतिबद्ध रहेको उल्लेख गर्दै यस कार्यमा सम्बन्धित सबै निकायबाट सहयोग प्राप्त हुने अपेक्षा व्यक्त गरेका छन्।
