अजम्बर पुलामी –
२५ बैशाख, बेलका / उदयपुरको बेलका नगरपालिका-६ स्थित Infinity Foundation Nepal (IFN) ले श्री जनता माध्यमिक विद्यालय, लामीडाँडा तथा श्री जनता माध्यमिक विद्यालय, पुमारेथुम्काका २/२ जना जेहेन्दार विद्यार्थीलाई पूर्ण छात्रवृत्ति प्रदान गरेको छ ।
शैक्षिक प्रोत्साहन तथा विद्यार्थीहरूको क्षमता अभिवृद्धि गर्ने उद्देश्यले फाउन्डेसनले नेपालका विभिन्न सरकारी विद्यालयहरूमा विशेष कार्यक्रम आयोजना गर्दै छात्रवृत्ति वितरण तथा अन्तर-सदन हाजिरीजवाफ प्रतियोगिता सम्पन्न गरेको हो ।
दक्षिण कोरियामा रहनुभएका फाउन्डेसनका संस्थापकद्वय प्रतीक राई तथा कुशल खड्का को मार्गदर्शनमा IFN ले नेपालभरिका सरकारी विद्यालयहरूमा विभिन्न शैक्षिक, सामाजिक तथा प्रेरणामूलक कार्यक्रम सञ्चालन गर्दै आइरहेको छ । सानो उमेरमै समाज सेवाको परिकल्पना तथा नेपालको शिक्षा प्रणालीलाई परिवर्तन गर्ने सपना रहेकोे राईले बताए ।
श्री जनता माध्यमिक विद्यालय, लामीडाँडामा आयोजित कार्यक्रम IFN की उपाध्यक्ष सुर्णाना चाम्लिङको सभापतित्वमा सम्पन्न भएको थियो । कार्यक्रममा कक्षा ४ का आयुष राई र कक्षा ३ की अनिता मगरलाई छात्रवृत्ति प्रदान गरिएको थियो । IFN का उपाध्यक्ष अभिषेक राईका अनुसार उत्कृष्ट शैक्षिक नतिजा र अनुशासित व्यवहारका आधारमा उनीहरूलाई छनोट गरिएको हो ।
छात्रवृत्ति अन्तर्गत विद्यार्थीहरूले चालु शैक्षिक सत्रको ट्युसन शुल्क, परीक्षा शुल्क, विद्यालय पोसाक, शैक्षिक भ्रमण शुल्क, झोला, जुत्ता-मोजाका साथै वर्षभरि आवश्यक पर्ने शैक्षिक सामग्री प्राप्त गरेका छन् ।
कार्यक्रममा प्रमुख अतिथि समाजसेवी लालबहादुर राई, विशेष अतिथि अभिषेक राई, विद्यालयका प्रधानाध्यापक भक्तबहादुर राई, विद्यालय व्यवस्थापन समितिका अध्यक्ष पृथबहादुर राई, IFN का संस्थापक प्रतीक राईकी आमा हिरा राई लगायत शिक्षक तथा अभिभावकहरूको उपस्थिति रहेको थियो ।
त्यसैगरी, श्री जनता माध्यमिक विद्यालय, पुमारेथुम्कामा आयोजित कार्यक्रममा IFN का अध्यक्ष अभिषेक राईको सभापतित्वमा कक्षा १० की एस्तर मगर र युनिता माझीलाई छात्रवृत्ति प्रदान गरिएको थियो । छात्रवृत्ति प्राप्त विद्यार्थीहरूलाई संस्थापक प्रतीक राईका बुबा लालबहादुर राईको विशेष उपस्थितिमा सामग्री हस्तान्तरण गरिएको थियो ।
सोही अवसरमा आयोजित अन्तर-सदन हाजिरीजवाफ प्रतियोगितामा अस्ट्रेलिया समूह ८५ अंकसहित प्रथम, अमेरिका समूह ६५ अंकसहित दोस्रो तथा एसिया समूह ४५ अंकसहित तेस्रो भएका छन् ।
यस्तै वक्तृत्वकला प्रतियोगितामा एस्तर मगर प्रथम, गीता राई दोस्रो तथा युनिता राई तेस्रो भएका छन् । विजयी विद्यार्थीहरूलाई शैक्षिक सामग्री र प्रमाणपत्र वितरण गरिएको थियो भने विभिन्न सहयोगी व्यक्तित्वहरूलाई मायाको चिनो सहित सम्मान गरिएको थियो ।
कार्यक्रममा प्रमुख अतिथि बेलका नगर युवा तथा खेलकुद विकास समितिका अध्यक्ष गोपिलाल राई, विद्यालयका प्रधानाध्यापक कृष्णबहादुर निरौला, विद्यालय व्यवस्थापन समितिका अध्यक्ष तेजबहादुर परियार, मेनेन्द्र चोङ्बाङ, शिक्षिका रमना राई लगायत शिक्षक तथा अभिभावकहरूको बाक्लो उपस्थिति रहेको थियो ।
कार्यक्रमको सञ्चालन IFN का प्रतिनिधि बिमोचन लकान्द्रीले गर्नुभएको थियो ।
