२३ जेठ, बेलका / बेलका नगरपालिकामा पहिलोपटक नमुना युवा संसद् प्रशिक्षण तथा अभ्यास कार्यक्रम सम्पन्न भएको छ। बेलका नगरपालिकाको आयोजना तथा शिक्षा शाखा रामपुरको समन्वय र सहकार्यमा जेठ २० गतेदेखि बेलकाको सभाहलमा सञ्चालन भएको उक्त कार्यक्रम शनिबार सम्पन्न भएको हो।
नगरपालिकाभित्र रहेका माध्यमिक विद्यालयमा अध्ययनरत विद्यार्थीहरूलाई सहभागी गराई नमुना युवा संसद्को अभ्यास तथा अभिमुखीकरण कार्यक्रम सञ्चालन गरिएको थियो। कार्यक्रममा युवाहरूले नेपालको शासन प्रणाली, संसद्को संरचना र सञ्चालन प्रक्रियाबारे व्यवहारिक अभ्यास गरेका थिए। सहभागीहरूले सत्तापक्ष र प्रतिपक्षको भूमिका निर्वाह गर्दै संसद् सञ्चालनको अभ्याससमेत गरेका थिए।
शिक्षा, युवा तथा खेलकुद शाखाका प्रमुख हरि कट्टेलका अनुसार युवाको नेतृत्व तथा क्षमता विकास, लोकतान्त्रिक अभ्यासप्रति रुचि बढाउने र राज्यलाई युवामैत्री नीति तथा कार्यक्रम निर्माणका लागि सुझाव दिन सक्षम बनाउने उद्देश्यले कार्यक्रम सञ्चालन गरिएको हो। नमुना संसद्ले विद्यार्थीहरूको नेतृत्व विकास, निर्णय क्षमता अभिवृद्धि तथा सार्वजनिक बोलाइ सम्बन्धी सीप विकासमा सहयोग पुग्ने विश्वास लिइएको उनले बताए।
स्थानीय तहमा युवाको सशक्तीकरण गर्दै सामाजिक, राजनीतिक तथा शैक्षिक मूलप्रवाहीकरणमा उनीहरूको सहभागिता सुनिश्चित गर्ने उद्देश्यले सञ्चालन गरिएको कार्यक्रममा ३० जनाभन्दा बढी विद्यार्थी सहभागी भएका थिए। उदयपुरका आठवटै स्थानीय तहमध्ये बेलका नगरपालिकामा पहिलोपटक नमुना युवा संसद् गठन तथा अभ्यास गरिएको जनाइएको छ।
कार्यक्रमअन्तर्गत विभिन्न चरण पूरा गरी शनिबार राष्ट्रपति, उपराष्ट्रपति, सभामुख तथा उपसभामुख चयन, सरकार गठन र प्रतिपक्ष निर्माणको अभ्यास सम्पन्न गरिएको थियो। छनोटमा परेका युवाहरूलाई नेतृत्व विकास तथा नमुना युवा संसद् सञ्चालनसम्बन्धी कार्यशालामार्फत प्रशिक्षण प्रदान गरिएको थियो।
शिक्षा, युवा तथा खेलकुद शाखाका प्रमुख हरि कट्टेलको अध्यक्षतामा सम्पन्न कार्यक्रमको प्रमुख अतिथिका रूपमा बेलका नगर उपप्रमुख जिरा राईको उपस्थिति रहेको थियो। कार्यक्रममा निमित्त प्रमुख प्रशासकीय अधिकृत रविकिरण आचार्य, वडा नं. ३ र ९ का वडाध्यक्ष, प्रशिक्षक रञ्जन पौडेल, शिक्षक, अभिभावक तथा विद्यार्थीहरूको सहभागिता रहेको थियो।
