बेलका / बालबालिकाको अधिकार संरक्षण तथा प्रवर्द्धनमा स्थानीय तहको भूमिकालाई सशक्त बनाउने उद्देश्यले बेलका नगरपालिकामा विशेष अन्तरक्रिया कार्यक्रम सम्पन्न भएको छ। श्रम तथा रोजगार कार्यालय, विराटनगरको आयोजनामा नगर सभाहलमा सम्पन्न कार्यक्रममा प्रमुख अतिथिका रूपमा बेलका नगर प्रमुख अशोक कार्कीको उपस्थिति रहेको थियो। कार्यक्रममा नगर उपप्रमुख जिरा राई, निमित्त प्रमुख प्रशासकीय अधिकृत रविकिरण आचार्य लगायत वडाध्यक्ष, महिला तथा बालबालिका शाखा प्रमुख, रोजगार शाखा प्रमुख, सामाजिक शाखा प्रमुख तथा नगरस्तरीय बाल सञ्जालका पदाधिकारीहरूको उल्लेखनीय सहभागिता रहेको थियो।
कार्यक्रममा बालश्रम, बालअधिकारका चुनौती, समाधान तथा स्थानीय तहको दायित्वबारे गहन छलफल गरिएको छ। प्रमुख अतिथि नगरप्रमुख कार्कीले बालबालिकालाई सुरक्षित, शिक्षित र सशक्त बनाउन पालिकाले निरन्तर पहल गर्दै आएको बताउनुभयो। साथै, उहाँले समुदाय, विद्यालय र अभिभावकबीचको सहकार्य अनिवार्य रहेकोमा जोड दिनुभयो। कार्यक्रममा बालश्रम न्यूनीकरण, विद्यालय पहुँच, पोषण तथा मानसिक स्वास्थ्यजस्ता सवालमा स्थानीय सरकारका रणनीति तथा आगामी योजनाहरूको समेत चर्चा गरिएको थियो।
