बैशाख २६, बेलका । उदयपुर जिल्लाको बेलका नगरपालिका वडा नं. ४ गुरुङचौरीस्थित जनता नमुना माध्यमिक विद्यालयमा सर्पदंशबाट बच्ने उपाय तथा प्राथमिक उपचार सम्बन्धी जानकारी मूलक एक दिने कार्यक्रम सञ्चालन हुने भएको छ।
नेपाली सेना अन्तर्गत पशुपति प्रसाद गण पिपलटार ब्यारेकले विद्यालयलाई पत्राचार गर्दै गर्मीयाम सुरु भएसँगै ग्रामीण क्षेत्रमा सर्पदंशका घटना बढ्न थालेकाले सचेतनामूलक कक्षा सञ्चालन गर्न लागिएको जनाएको हो।
कार्यक्रममा विद्यार्थीहरुलाई सर्पका प्रकार, सर्पदंशबाट बच्ने उपाय, सर्पले टोकेपछि अपनाउनुपर्ने प्राथमिक उपचार, गर्न नहुने कार्य तथा समयमै स्वास्थ्य संस्थामा पुग्नुपर्ने विषयमा जानकारी दिइने बताइएको छ। विशेषगरी विद्यालय आउने–जाने क्रममा तथा खेल्ने समयमा बालबालिका बढी जोखिममा पर्ने भएकाले सचेतना अभिवृद्धि गर्न कार्यक्रम आयोजना गरिएको जनाइएको छ।
नेपाली सेनाले सर्प देखिएमा आत्तिनु भन्दा सावधानी अपनाउन, झारफुक वा घरेलु उपचारमा समय खेर नफाल्न तथा तत्काल स्वास्थ्य संस्थामा जान आग्रह गरेको छ।
उक्त सचेतनामूलक कार्यक्रम बैशाख २८ गते दिनको १ बजे विद्यालय परिसरमा सञ्चालन हुने विद्यालय प्रशासनले जनाएको छ।
