३१ बैशाख, बेलका / युनिक शिशु सदन प्रा.लि. बेलका-०४ को सहकार्यमा बेलका नगरपालिका अन्तर्गत सञ्चालित अन्तर संस्थागत विद्यालय स्तरीय हाजिरी-जवाफ प्रतियोगिता भव्य तथा सभ्य रूपमा सम्पन्न भएको छ। विद्यार्थीहरूमा ज्ञान, सिर्जनशीलता, नेतृत्व क्षमता, तर्कशक्ति तथा स्वस्थ शैक्षिक प्रतिस्पर्धाको भावना विकास गर्ने उद्देश्यले आयोजित कार्यक्रममा विभिन्न विद्यालयहरूको उत्साहजनक सहभागिता रहेको थियो।
कार्यक्रमको सभाअध्यक्षता बेलका नगर PABSON सचिव ललित राईले गर्नुभएको थियो भने प्रमुख अतिथिका रूपमा बेलका नगरपालिका वडा नं. ४ का वडा अध्यक्ष तिर्थराज अधिकारीको उपस्थिति रहेको थियो। कार्यक्रममा विभिन्न विद्यालय सञ्चालक, प्रधानाध्यापक तथा प्रतिनिधि शिक्षकहरूको विशेष आतिथ्यता रहेको थियो। कार्यक्रम युनिक शिशु सदन प्रा.लि.का शिक्षक सितल अधिकारीले सञ्चालन गर्नुभएको थियो।
प्रतियोगितामा General Quiz Round, Rapid Five Round, Music and Voice Recognition Round, Figure Round, Gaun Khane Katha and Ukhan Tukka Round, Leaders Challenge Round तथा IQ Challenge Round लगायतका विविध तथा रोचक चरणहरू समावेश गरिएको थियो। सहभागी विद्यार्थीहरूले उत्कृष्ट प्रस्तुति दिँदै कार्यक्रमलाई निकै रोमाञ्चक, प्रतिस्पर्धात्मक तथा ज्ञानवर्द्धक बनाएका थिए।
कार्यक्रमलाई थप आकर्षक बनाउन युनिक शिशु सदन प्रा.लि.का विद्यार्थी सुमा सुनुवार र आकृति थुलुङ राईले उत्कृष्ट नृत्य प्रस्तुत गरी मनोरञ्जन प्रदान गरेका थिए।
प्रतियोगितामा युनिक शिशु सदन प्रा.लि. प्रथम, गौरी सुर्योदय इङ्लिस बोर्डिङ स्कुल द्वितीय तथा रामपुर पब्लिक एकेडेमी तृतीय हुन सफल भएका छन्। विजेता विद्यालयहरूलाई प्रमाणपत्र, ट्रफी तथा मेडल प्रदान गरिएको थियो। साथै सहभागी विद्यार्थीहरूलाई पनि सहभागिताको प्रमाणपत्र र मेडल प्रदान गरिएको थियो।
यसै कार्यक्रममा बेलका प्याब्सन तथा एन-प्याब्सनको संयुक्त शैक्षिक सत्र २०८३ को शैक्षिक पात्रो समेत वितरण गरिएको थियो।
कार्यक्रमलाई सम्बोधन गर्दै प्रमुख अतिथिले यस्ता शैक्षिक तथा बौद्धिक गतिविधिहरूले विद्यार्थीहरूको क्षमता अभिवृद्धि गर्नुका साथै अनुशासन, आत्मविश्वास, नेतृत्व विकास र प्रतिस्पर्धात्मक भावना वृद्धि गर्न महत्वपूर्ण भूमिका खेल्ने बताउनुभयो। उहाँले विद्यालयहरूले केवल पाठ्यपुस्तकमा सीमित नभई अतिरिक्त क्रियाकलापमार्फत पनि विद्यार्थीहरूको प्रतिभा प्रस्फुटन गराउन आवश्यक रहेको धारणा व्यक्त गर्नुभयो।
सभाअध्यक्ष ललित राईले निजी विद्यालयहरूबीच सहकार्य, समन्वय तथा शैक्षिक गुणस्तर अभिवृद्धिका लागि यस्ता कार्यक्रम प्रभावकारी हुने बताउँदै आगामी दिनमा अझ व्यवस्थित रूपमा कार्यक्रम सञ्चालन गरिने जानकारी दिनुभयो। साथै कार्यक्रमको सफल व्यवस्थापनमा महत्वपूर्ण भूमिका निर्वाह गर्ने युनिक शिशु सदन प्रा.लि. तथा विद्यालयका प्रधानाध्यापक लेखनाथ सुवेदीप्रति विशेष धन्यवाद व्यक्त गर्नुभयो।
कार्यक्रम सफल बनाउन सहयोग गर्ने सम्पूर्ण विद्यालय परिवार, शिक्षक–शिक्षिका, विद्यार्थी, अभिभावक तथा प्रत्यक्ष–अप्रत्यक्ष रूपमा सहयोग पुर्याउने सबैप्रति आयोजकले आभार व्यक्त गरेका छन्।
