२८ जेठ, बेलका / उदयपुरको बेलका नगरपालिकाले कृषकहरूलाई ५० प्रतिशत अनुदानमा कृषि तथा पशुपालनसँग सम्बन्धित विभिन्न उपकरण वितरण गरेको छ।
कृषि तथा पशु सेवा शाखाको आर्थिक वर्ष २०८२/०८३ को वार्षिक स्वीकृत कार्यक्रम अन्तर्गत ५० प्रतिशत लागत साझेदारीमा हाते ट्र्याक्टर, मल्टिक्रप थ्रेसर, कम्बाइन मिल, च्यापकटर तथा स्प्रे ट्याङ्की लगायतका उपकरण कृषकहरूलाई हस्तान्तरण गरिएको हो।
कृषि तथा पशुपालन क्षेत्रको आधुनिकीकरण, उत्पादन वृद्धि तथा कृषकहरूको श्रम र लागत न्यूनीकरण गर्ने उद्देश्यले प्रविधि हस्तान्तरण कार्यक्रम सञ्चालन गरिएको बेलका नगरपालिकाले जनाएको छ।
आज आयोजित कार्यक्रममा बेलका नगरपालिकाका नगर प्रमुख अशोक कार्कीको अध्यक्षतामा कृषकहरूलाई उपकरण वितरण गरिएको हो। कार्यक्रममा नगर उपप्रमुख जिरा राई, कृषि शाखा प्रमुख हिमाल गुरागाईं, पशु शाखाका कर्मचारी तथा कृषकहरूको उपस्थिति रहेको थियो।
बेलका नगरपालिकाले यस्ता कार्यक्रमले कृषकलाई आधुनिक कृषि प्रविधिको पहुँच विस्तार गर्न सहयोग पुग्ने विश्वास व्यक्त गरेको छ।
