५ असार, बेलका / “सबल आर्थिक, सामाजिक र भौतिक पूर्वाधार – बेलका नगर विकासको प्रमुख आधार” भन्ने मूल नाराका साथ बेलका नगरपालिकाको १८ औँ नगरसभा अधिवेशन नगरप्रमुख अशोक कार्कीको सभाध्यक्षतामा सुरु भएको छ।
नगरसभा अधिवेशनमा नगर उपप्रमुख जिरा राई, निमित्त प्रमुख प्रशासकीय अधिकृत, ९ वटै वडाका नगरसभा सदस्यहरू, विषयगत शाखाका प्रमुख तथा प्रतिनिधिहरूको उपस्थिति रहेको थियो।
कार्यक्रममा बेलका-३ स्थित बेलका नौमती बाजा महिला समूहले स्वागत प्रस्तुति दिएको थियो। नगरपालिकाको तालिम, सीप विकास तथा प्रोत्साहन कार्यक्रमबाट सशक्त बनेको उक्त समूहले महिला सशक्तीकरण, कला-संस्कृति संरक्षण र आत्मनिर्भरता प्रवर्द्धनमा सकारात्मक योगदान पुर्याउँदै आएको छ।
अधिवेशनमा आर्थिक वर्ष २०८३/०८४ का लागि बेलका नगरपालिकाको नीति तथा कार्यक्रम प्रस्तुत गरिएको छ। साथै संघीय सरकार, प्रदेश सरकार, स्थानीय राजस्व तथा आन्तरिक स्रोतबाट प्राप्त हुने गरी कुल रु. ७५ करोड ३१ लाख १० हजार १२४ बजेट स्रोत प्रस्तुत गरिएको छ।
बजेट स्रोतमा संघीय सशर्त, समपूरक, विशेष तथा समानीकरण अनुदान, संघीय र प्रदेश राजस्व बाँडफाँड, स्थानीय राजस्व, घरजग्गा रजिष्ट्रेशन शुल्क, आन्तरिक स्रोत तथा सडक बोर्डको रकम समावेश रहेको छ।
नगरसभामार्फत आर्थिक विकास, सामाजिक क्षेत्र, पूर्वाधार निर्माण, प्रभावकारी सेवा प्रवाह तथा समृद्ध बेलका निर्माणका लागि नीति, कार्यक्रम र बजेटमाथि छलफल अघि बढाइएको छ।
