०१ श्रावण, बेलका / बेलका नगरपालिका वडा नम्बर ४ मा कृषि, पशुपन्छी तथा मत्स्य सिकाइ केन्द्रको आज उद्घाटनसँगै सेवा सञ्चालन सुरु गरिएको छ।
नगरप्रमुख अशोक कार्कीले केन्द्रको उद्घाटन गर्नुभयो। वडाध्यक्ष तिर्थराज अधिकारीको अध्यक्षतामा सम्पन्न कार्यक्रममा नगर उपप्रमुख जिरा राई, प्रमुख प्रशासकीय अधिकृत रविकिरण आचार्य, वडा नम्बर ३, ८ र ९ का वडाध्यक्षहरू, कार्यपालिका सदस्य, समाजसेवी र कृषकहरूको उपस्थिति थियो।
केन्द्रबाट कृषक, पशुपालक र माछापालकहरूले उपचार सेवा, बन्ध्याकरण, खोप, बिमा, शिविर, सामान्य अप्रेसन तथा परामर्शसहित अन्य सेवाहरू समेत लिन सक्नेछन्।
बिशेष गरी बेलका नगरपालिका वडा नम्बर ४, ५, ६ र ३ का कृषकहरूले प्रत्यक्ष लाभ लिन सक्ने छन्।
कार्यक्रममा नगरप्रमुख कार्कीले आधुनिक कृषि र व्यवसायिक कृषिमा युवाहरूको सहभागिता बढाउन यस्ता सिकाइ केन्द्र आवश्यक रहेको बताउनुभयो। उहाँले उत्पादनमुखी तालिम, प्रविधि विस्तार र अनुदान कार्यक्रमलाई अझ प्रभावकारी बनाउने प्रतिबद्धता समेत व्यक्त गर्नुभयो।
