अजम्बर पुलामी-
२२ असार, बेलका / उदयपुरको बेलका नगरपालिकाले नगर अस्पतालको स्वास्थ्य सेवामा थप सुधार गर्दै प्रविधि स्तरोन्नति तथा सेवा विस्तार कार्यक्रम सुरु गरेको छ। सोमबार आयोजित कार्यक्रममा नगरप्रमुख अशोक कार्कीले नयाँ सेवाको औपचारिक उद्घाटन गरेका हुन्।
यसअघि पोर्टेबल एक्स-रे सेवा सञ्चालनमा रहेको अस्पतालले अब ३२ लाख रुपैयाँ लागतमा खरिद गरिएको आधुनिक भिडिओ एक्स-रे मेसिनमार्फत सेवा दिन थालेको छ। साथै, अस्पतालमा पहिलोपटक आईपीडी (इनडोर प्यासेन्ट डिपार्टमेन्ट) सेवा पनि विस्तार गरिएको छ। रामपुर स्वास्थ शाखाका अधिकृत विनोद मिश्रका अनुसार भिडिओ एक्स-रे सेवा वर्षभर नियमित रूपमा सञ्चालन हुनेछ।
नगर अस्पतालले ग्रामीण क्षेत्रमा पुगेर भिडिओ एक्स-रे सेवा तथा नसर्ने रोग सम्बन्धी स्वास्थ्य शिविर सञ्चालन गर्दै आएको छ। अस्पतालमा हाल ओपिडी, आकस्मिक सेवा, डिजिटल एक्स-रे, प्रयोगशाला, प्रसूति सेवा, सर्पदंश उपचार र दैनिक आँखा परीक्षण सेवा उपलब्ध छन्।
विशेषज्ञ सेवाअन्तर्गत प्रत्येक मंगलबार दन्त उपचार तथा महिनाको पहिलो बुधबार मानसिक स्वास्थ्य विशेषज्ञ सेवा पनि सञ्चालन हुँदै आएको छ।
अस्पतालको सेवा विस्तारसँगै कुमारी बैंकको बेलका शाखाले सामाजिक उत्तरदायित्व कार्यक्रमअन्तर्गत १५ थान थ्री-सिटर आर्म चेयर सहयोग गरेको छ। शाखा प्रमुख दिवाकर कट्टेलले स्वास्थ्य र शिक्षाजस्ता क्षेत्रमा बैंकले निरन्तर सहयोग गर्दै आएको बताए।
कार्यक्रम स्वास्थकर्मी, सुरक्षाकर्मी, पत्रकार विभिन्न राजनीति दलका प्रतिनिधिहरु समाजसेवी बुद्धिजीवी लगायतको उपस्थित रहेकोे थियो।
