अजम्बर पुलामी-
२२ असार, बेलका / उदयपुरको बेलका नगरपालिका-९ मा आयोजित ‘फ्री फायर स्क्वाड म्याच’ प्रतियोगितामा मिलन गहतराजको टोली प्रथम हुँदै नगद १० हजार रुपैयाँ पुरस्कार जित्न सफल भएको छ।
नकआउट फर्म्याटमा सञ्चालन गरिएको प्रतियोगितामा ६ टोली सहभागी भएका थिए। प्रतिस्पर्धाका विभिन्न चरण पार गर्दै गहतराज नेतृत्वको चार सदस्यीय टोली विजेता बनेको हो।
प्रतियोगितामा युगान्त ढुंगानाको टोली उपविजेता बन्दै ५ हजार रुपैयाँ प्राप्त गर्न सफल भयो भने तेस्रो स्थान हासिल गर्ने टोलीले २ हजार रुपैयाँ नगद पुरस्कार पायो। उत्कृष्ट टोलीहरूलाई नगदसहित प्रमाणपत्र पनि प्रदान गरिएको आयोजकले जनाएको छ।
फ्री फायर मोबाइलमा आधारित ई-स्पोर्ट्स प्रतियोगिता हो, जहाँ खेलाडीहरू एकल वा टोलीगत रूपमा प्रतिस्पर्धा गर्छन्। यसमा रणनीति, टिमवर्क, किल स्कोर र अन्तिमसम्म टिक्ने क्षमताका आधारमा विजेता छनोट गरिन्छ।
वडा नम्बर ९ को कार्यालयले नगरपालिकाको आन्तरिक स्रोतबाट विनियोजित बजेटमार्फत प्रतियोगिता आयोजना गरेको वडाध्यक्ष भरत घिमिरेले जानकारी दिए। उनका अनुसार राष्ट्रियस्तरका फ्री फायर खेलाडी उत्पादन गर्नुका साथै मोबाइल प्रविधिमार्फत युवाहरूलाई ई-स्पोर्ट्स र आर्थिक अवसरतर्फ आकर्षित गर्ने उद्देश्यले प्रतियोगिता आयोजना गरिएको हो।
