अजम्बर पुलामी-
२० चैत, बेलका / सहयोगी बचत तथा ऋण सहकारी संस्था लिमिटेडको आयोजना तथा रक्त सञ्चार केन्द्र धरान-घोपाको प्राविधिक सहयोगमा एकदिवसीय खुला रक्तदान कार्यक्रम सम्पन्न भएको छ।
६९औँ राष्ट्रिय सहकारी दिवसको अवसरमा बेलका नगरपालिका-९ रामपुरमा आयोजित उक्त कार्यक्रममा उत्साहजनक सहभागिता देखिएको थियो। कार्यक्रममा पुरुष १३० र महिला ४५ गरी कुल १७५ जनाले रक्तदान गरेको सहकारीका व्यवस्थापक तेजबहादुर खड्काले जानकारी दिए।
सहकारीले प्रत्येक वर्ष राष्ट्रिय सहकारी दिवसको अवसरमा यस्ता सामाजिक कार्यक्रम गर्दै आएको उल्लेख गर्दै कोषाध्यक्ष तथा कार्यक्रम संयोजक मोहनप्रसाद घिमिरेले आगामी वर्षहरूमा पनि यसलाई निरन्तरता दिने प्रतिबद्धता व्यक्त गरे।
कार्यक्रम सफल बनाउन वडा नं. ९, ४, ५ र ८ का वडा कार्यालयहरू साथै मर्निङ ग्लोरि इङलिस बोर्डिङ स्कुल बेलका-९ लिटल स्टार एकेडेमी बेलका ५, रामपुर पब्लिक एकेडेमी बेलका -९, चन्द्रमणी ज्वलर्स बेलका ९, सीता अपसेट छापाखाना बेलका-९, बिरेन्द्र मेडिकल हल बेलका ९, सरस्वती डेन्टल केयर सेन्टर प्रालि बेलका ९, ठोक्सिला कानुनि सेवा त्रियुगा १० न्यु विद्यार्थी पुस्तक पसल बेलका ९, निर्माण सप्लायर्स बेलका९, गहतराज निर्माण सेवा बेलका ९, पाथिभरा श्री ट्रेडर्ज, हाम्रो ट्रेडलिक बेलका ९ र ग्रेस इलेक्ट्रोनिक सप संस्थाहरूले सहयोग गरेका थिए। सहयोगी संस्थाहरूलाई मायाको चिनो सहित सम्मान गरिएको सहकारीका अध्यक्ष गणेश बस्नेतले बताए।
उक्त कार्यक्रममा बेलका नगरपालिकाका नगर प्रमुख अशोक कार्की, प्रमुख प्रशासकीय अधिकृत विनोद भट्टराई, वडा नं. ५ का अध्यक्ष दीपकराज रेग्मी लगायत विभिन्न संघ-संस्थाका प्रतिनिधि, समाजसेवी तथा बुद्धिजीवीहरूको उपस्थिति रहेको थियो।
