अजम्बर पुलामी-
२२ चैत, बेलका / उदयपुरको बेलका नगर क्षेत्रमा पहिलोपटक “बेलका प्राकृति, सांस्कृतिक तथा साहसिक महोत्सव-२०८३” आयोजना हुने भएको छ। बेलका नगर पर्यटन विकास समिति, उदयपुर विकास बोर्ड र जिल्ला समन्वय समिति उदयपुरको संयुक्त आयोजनामा बैशाख १ गतेदेखि ७ गतेसम्म महोत्सव सञ्चालन हुने जनाइएको छ।
महोत्सवलाई सफल बनाउन आज स्थानीय सरोकारवालासँग बृहत् छलफल कार्यक्रम सम्पन्न गरिएको छ। उक्त छलफलमा महोत्सवको पूर्वतयारी, व्यवस्थापन तथा कार्यक्रम सञ्चालनबारे विस्तृत रूपमा कुराकानी गरिएको थियो।
महोत्सव अवधिभर विभिन्न जातजातिका झाँकी प्रदर्शन, साइकलिङ रेस, तथा बेलका नगरभित्रका धार्मिक तथा पर्यटकीय स्थलहरूको भ्रमण र दर्शन कार्यक्रम सञ्चालन गरिनेछ। महोत्सवको अन्तिम दिन बेलका-८ स्थित मङ्काली मन्दिर र बराहक्षेत्रको दर्शन गरी मैनामैनीमा समापन गरिने बेलका नगर पर्यटन विकास समितिका सचिव टंक प्रसाद फुयाल शर्माले जानकारी दिनुभयो।
त्यसैगरी, महोत्सव अवधिभर बेलकाका होटल व्यवसायीहरूले खाना, बसोबास, बोटिङ, र्याफ्टिङ र प्याराग्लाइडिङ लगायतका सेवामा विशेष छुट प्रदान गर्ने जानकारी समेत दिइएको छ।
आजको छलफल कार्यक्रममा त्रियुगा नगरपालिकाका पूर्व मेयर बलदेव चौधरी, बेलका नगरपालिकाका नगर प्रमुख अशोक कार्की, चौदण्डीगढी नगरपालिकाका पूर्व नगर प्रमुख खगेन्द्र राई, श्रम संस्कृति पार्टीका नेता राजेश खिम्दुङ, विभिन्न वडा अध्यक्ष, पर्यटन विकास समितिका प्रतिनिधि, समाजसेवी, बुद्धिजीवी तथा स्थानीयहरूको उपस्थिति रहेको थियो।
