२८ चैत, बेलका / उदयपुर जिल्लाको रौतापोखरी क्षेत्रमा ‘प्रथम रौतामाई-त्रियुगा पर्यटन महोत्सव’ भोलिदेखि सुरु हुने भएको छ । ‘कला, संस्कार र संस्कृतिको उत्थान तथा पर्यटन प्रवर्द्धन’ भन्ने आदर्श वाक्यसहित आयोजना गरिएको महोत्सव चैत २९ देखि वैशाख ३ गतेसम्म सञ्चालन हुने आयोजक समितिले जनाएको छ ।
रौतामाई गाउँपालिका-६ मा अवस्थित रौतापोखरी प्राकृतिक, धार्मिक तथा ऐतिहासिक महत्व बोकेको क्षेत्रका रूपमा परिचित छ । समुद्री सतहबाट करिब ५ हजार ५ सय फिट उचाइमा रहेको यस स्थान वरिपरि हरियाली जंगल, जैविक विविधता, वन्यजन्तु, चराचुरुङ्गी तथा जडीबुटीले भरिपूर्ण वातावरण पाइन्छ ।
शान्त वातावरण, खुला आकाश र हिमशृङ्खलाको दृश्यले रौतापोखरीलाई अझ आकर्षक बनाएको छ । मौसम सफा भएका दिनमा सगरमाथा लगायत पूर्वी नेपालका विभिन्न हिमालहरू अवलोकन गर्न सकिने विशेषता यस क्षेत्रको प्रमुख आकर्षण हो ।
स्थानीय जनविश्वास र किंवदन्तीका कारण रौतापोखरी धार्मिक दृष्टिले पनि महत्वपूर्ण मानिन्छ । मगर भाषाबाट आएको ‘रौताहा’ शब्दसँग जोडिएको नामकरणले यसको मौलिक पहिचान झल्काउँछ । प्राचीन कथन अनुसार भेडा चराउने क्रममा यहाँ आइपुगेका व्यक्तिसँग सम्बन्धित घटनाहरू तथा भाकलका प्रसङ्गहरूले यस क्षेत्रप्रतिको आस्था अझ बलियो बनाएको छ ।
पोखरीको उत्तर-पश्चिमतर्फ अवस्थित रौतामाई मन्दिर ले यस क्षेत्रलाई प्रमुख तीर्थस्थलका रूपमा चिनाएको छ । प्रत्येक वर्ष वैशाख १ गते लाग्ने मेला स्थानीयसँगै टाढा-टाढाबाट आउने श्रद्धालु तथा पर्यटकहरूको भेटघाटको केन्द्र बन्दै आएको छ । यस वर्ष सोही मेलालाई विशेष बनाउन महोत्सवकै रूपमा आयोजना गरिएको आयोजक समितिले जानकारी दिएका छन् ।
