अजम्बर पुलामी-
१ बैशाख, बेलका / “बेलकाको जल, जमिन र आकाशमा रमाऔं, ऐतिहासिक, प्राकृतिक, सांस्कृतिक र साहसिक पर्यटन प्रवर्द्धन गरौं” भन्ने मूल नारासहित प्रथम बेलका पर्यटन महोत्सव २०८३ सुरु भएको छ। बेलका नगर पर्यटन विकास समिति, उदयपुर पर्यटन विकास बोर्ड र बेलका होटल तथा पर्यटन समितिको आयोजनामा महोत्सव सुरु भएको हो। महोत्सव अवधिभर बोटिङ, र्याफ्टिङ, प्याराग्लाइडिङ, सांस्कृतिक कार्यक्रम, लगायत विविध आकर्षक कार्यक्रमहरू समावेश गरिएका छन्।
बेलका नगरभित्र रहेका धार्मिक तथा पर्यटकीय स्थलहरूको अवलोकन र प्रचारप्रसार गर्ने उद्देश्यले आयोजना गरिएको महोत्सव बैशाख ६ गतेसम्म सञ्चालन हुने भएको छ। महोत्सव सफल बनाउन जनप्रतिनिधि, पर्यटन समितिका प्रतिनिधि तथा स्थानीयवासीहरू एकजुट भएर सक्रिय भएका छन्।
मंगलबार आयोजित उद्घाटन कार्यक्रममा बेलका नगर प्रमुख अशोक कार्कीले ब्यानर पढेर महोत्सव उद्घाटन गर्नुभएको थियो। साथै, श्री बेलका राजारानी मन्दिरको परिक्रमा गरी अतिथिहरूले संयुक्त रूपमा परेवा उडाएर महोत्सवको औपचारिक शुभारम्भ गरेको थियोे ।
उद्घाटन समारोहमा बोल्दै नगर प्रमुख कार्कीले नयाँ वर्ष २०८३ को शुभकामना व्यक्त गर्दै पर्यटन प्रवर्द्धनले बेलकाको समग्र विकास र समृद्धिमा महत्वपूर्ण भूमिका खेल्ने बताउनुभयो। उहाँले बेलका नगरभित्र रहेका ३२ वटा पर्यटन सूचक क्षेत्रलाई केन्द्रमा राखेर प्रवर्द्धन कार्यक्रम सुरु गरिएको र यसका लागि डिपिआरदेखि विभिन्न योजनाहरू अघि बढाइएको जानकारी दिनुभयो।
कार्यक्रमका विशेष अतिथि चौदण्डीगढी नगरका पूर्व नगर प्रमुख खगेन्द्र राईले नेपाल आफैंमा पर्यटकीय सम्भावनाले भरिपूर्ण देश भए पनि यसको सही उपयोग हुन नसकेको बताउनुभयो। अन्य देशहरूले पर्यटनमार्फत आर्थिक उन्नति गरेको उदाहरण दिँदै उहाँले बेलकाका पर्यटन क्षेत्रलाई आकर्षक बनाउन सके महोत्सव सार्थक हुने धारणा राख्नुभयो।
त्यसैगरी, त्रियुगा नगरपालिकाका पूर्व नगर प्रमुख बलदेव चौधरीले नयाँ वर्षको शुभकामना व्यक्त गर्दै पर्यटन महोत्सवलाई दीर्घकालीन रूपमा सफल बनाउन वर्षभरि पर्यटक आउने वातावरण सिर्जना गर्नुपर्नेमा जोड दिनुभयो।
कार्यक्रम पर्यटन समितिका अध्यक्ष शिवकुमार थापाको अध्यक्षतामा सम्पन्न भएको थियो। कार्यक्रममा वडा अध्यक्षहरू, कार्यपालिका सदस्यहरू, विभिन्न संघसंस्थाका प्रतिनिधिहरू, समाजसेवी तथा स्थानीयवासीहरूको उपस्थिति रहेको थियो।
