अजम्बर पुलामी-
२८ चैत, बेलका / उदयपुरको बेलका नगरपालिका-६ देउरालीमा “हाम्रो प्रतिबद्धता समृद्धका लागि युवा एकता” भन्ने मूल नारासहित दोस्रो देउराली कप खुल्ला वडा स्तरीय तथा स्कुल स्तरीय भलिबल प्रतियोगिता २०८२ आजदेखि सुरु भएको छ।
देउराली समाजको आयोजनामा तथा बेलका नगरपालिका र नगर युवा तथा खेलकुद विकास समितिको समन्वयमा देउराली भलिबल खेलमैदानमा प्रतियोगिता सञ्चालन गरिएको हो। प्रतियोगिताको बेलका नगरपालिकाका प्रमुख अशोक कार्कीले ब्यानर पढेर उद्घाटन गर्नुभयो।
उद्घाटन कार्यक्रममा नगर उपप्रमुख जीरा राई, वडा नम्बर ६का वडा सदस्यहरू नारायण राई र विभा राई, नगर युवा तथा खेलकुद विकास समितिका अध्यक्ष गोपिलाल राई, बेलका रिभर बिच रिसोर्टका संचालक रमन भट्टराई, पत्रकार, समाजसेवी बुद्धिजीवी लगायत खेलप्रेमिहरुको उपस्थित रहेको थियो।
कार्यक्रम देउराली समाजका अध्यक्ष नरेश राईको अध्यक्षता तथा सुस्मिता राईको स्वागत मन्तव्यसँगै सम्पन्न भएको उद्घाटन सत्रपछि खेलहरू सुरु भएका छन्।
चैत ३० गतेसम्म सञ्चालन हुने प्रतियोगितामा १६ टिमको सहभागिता रहेको छ। प्रतियोगितामा प्रथम हुने टिमलाई २५ हजार ५ सय ५५ रुपैयाँ, द्वितीय हुने टिमलाई १५ हजार ५ सय ५५ रुपैयाँसहित मेडल, ट्रफी र प्रमाणपत्र प्रदान गरिने आयोजकले जनाएको छ। साथै फाइनलिस्टमा पुग्ने दुवै टिमलाई ५ हजार ५ सय ५५ रुपैयाँ प्रदान गरिनेछ। उत्कृष्ट स्पाइकर, लिबेरो, सेटर तथा ‘टुर्नामेन्टको उत्कृष्ट खेलाडी’ लाई पनि विशेष पुरस्कार प्रदान गरिनेछ।
उद्घाटन खेलमा श्री जनता नमुना माध्यमिक विद्यालय गुरुङचौरी र भोजपुरको रामप्रसाद राई गाउँपालिका-बासिखोराबीच प्रतिस्पर्धा भएको थियो। खेलमा रामप्रसाद राई गाउँपालिका बासिखोराले उत्कृष्ट प्रदर्शन गर्दै सोझो सेटमा जित हात पारेको छ।
त्यसैगरी आयोजक “A” र बन कर्मचारी लालबजारबीचको खेलमा बन कर्मचारी लालबजारको टोली अनुपस्थित भएपछि आयोजक टोली स्वतः अर्को चरणमा प्रवेश गरेको छ।
