२० पुष, बेलका / उदयपुर जिल्लाको बेलका नगरपालिकामा घरेलु विवादका क्रममा छुरा प्रहार हुँदा एक महिलाको मृत्यु भएको छ भने श्रीमानले आत्महत्याको प्रयास गरेका छन्।
आज बिहान करिब ८ बजे बेलका नगरपालिका वडा नम्बर ३ स्थित किरात चोकमा बस्ने करिब ३० वर्षीय खगेन्द्र राई र उनकी २७ वर्षीया श्रीमती भावना भनिने गंगा राईबीच आपसी झै-झगडा भएको थियो। सोही क्रममा श्रीमान खगेन्द्र राईले श्रीमतीमाथि धारिलो छुरा प्रहार गर्दा गम्भीर घाइते भएकी गंगा राईलाई उपचारका लागि धरानस्थित बी.पी. कोइराला स्वास्थ्य विज्ञान प्रतिष्ठान लगिएको थियो। उपचारकै क्रममा उनको मृत्यु भएको अस्पतालले जनाएको छ।
घटनापछि खगेन्द्र राईले आफ्नै शरीरमा समेत छुरा प्रहार गरी आत्महत्याको प्रयास गरेका थिए। स्थानीयले देखेपछि उनलाई पनि तत्काल उपचारका लागि सोही अस्पताल लगिएको छ। हाल उनको उपचार प्रहरीको प्रत्यक्ष निगरानीमा भइरहेको छ।
घटनाको जानकारी पाएलगत्तै इलाका प्रहरी कार्यालय रामपुरठोक्सिलाबाट प्रहरी टोली खटिएर घटनाबारे थप अनुसन्धान भइरहेको प्रहरीले जनाएको छ।
