२३ कात्तिक, बेलका / उदयपुरको बेलका नगरपालिकाले वैकल्पिक ऊर्जा प्रवर्द्धन कार्यक्रमको सहयोगमा सुधारिएको फलामे चुलो वितरण कार्यको आजबाट औपचारिक शुभारम्भ गरेको छ।
कार्यक्रम नगरप्रमुख अशोक कार्कीको अध्यक्षतामा सम्पन्न भएको थियो। सो अवसरमा उप–प्रमुख जिरा राई, वडा नं. ९ का अध्यक्ष भरत घिमिरे, कार्यपालिका सदस्य नानुमैया घिमिरे, कृषि शाखा प्रमुख तथा वैकल्पिक ऊर्जा प्रवर्द्धन कार्यक्रमका फोकल व्यक्ति इन्जि. हिमाल गुरागाईं, कर्मचारी बिष्णु प्रसाद खतिवडा लगायतको उपस्थितिमा पहिलो चरणको चुलो वितरण गरिएको हो।
यस अभियानमार्फत वातावरणमैत्री ऊर्जा प्रयोगलाई प्रोत्साहन गर्दै इन्धन बचत, धुवाँ प्रदूषण न्यूनीकरण तथा ग्रामीण घरपरिवारको दैनिकी सहज बनाउने उद्देश्य लिइएको नगरपालिकाले जनाएको छ।
माग फारमका आधारमा सम्बन्धित सबै वडामा चुलो पठाइएको छ र नगरवासीलाई आफ्नो वडा कार्यालयमार्फत सुधारिएको फलामे चुलो लिन अनुरोध गरिएको छ।
