भदौ ४, बेलका / उदयपुरको बेलका नगरपालिका–२ निवासी ५७ वर्षीय तिखे तामाङ बुधबार बिहान मृत अवस्थामा फेला परेका छन्।
मंगलबार दिउँसो करिब २ बजे धानखेत गोड्न निस्केका तामाङ बेलुकीसम्म घर नफर्किएपछि परिवार र गाउँलेहरूले खोजी सुरु गरेका थिए। खोजीमा पनि नभेटिएपछि प्रहरीले जानकारी पाएको थियो।
बुधबार बिहानैदेखि स्थानीयले खोजी गर्ने क्रममा बेलका २ शान्तिनगर बुधवारे पश्चिमस्थित होलीमा डुबेको अवस्थामा बिहान ७ बजेर २० मिनेटमा तामाङलाई फेला पारेका हुन्।
मृतकलाई उनका छोरा रमेश तामाङ र गाउँलेहरूले भेटेका थिए। यस घटनाबारे प्रहरीले आवश्यक अनुसन्धान अघि बढाएको र शवलाई पोष्टमार्टमका लागि पठाइएको जनाएको छ।
