२७ असार, बेलका / बेलका नगरपालिकाको सभाहलमा शुक्रबार जिल्ला प्रहरी कार्यालय उदयपुरको आयोजनामा नागरिक सुनुवाइ कार्यक्रम सम्पन्न गरिएको छ।
कार्यक्रममा बेलका नगरपालिकाका नगरप्रमुख अशोक कार्की प्रमुख अतिथि रहनुभएको थियो भने उपप्रमुख जिरा राई र जिल्ला प्रहरी कार्यालय उदयपुरका प्रमुख प्रहरी उपरीक्षक (एसपी) हरिहरनाथ योगी विशेष अतिथिका रूपमा सहभागी हुनु भएको थियो।
प्रहरी सेवा, शान्ति सुरक्षा, अपराध नियन्त्रण तथा जनगुनासोको समाधानका विषयमा नागरिकको प्रत्यक्ष सहभागिता, जवाफदेहिता र समन्वय सुदृढ गर्ने उद्देश्यले कार्यक्रम आयोजना गरिएको हो।
कार्यक्रमका प्रमुख अतिथि नगरप्रमुख कार्कीले प्रहरी र जनताको सम्बन्ध विश्वासमा आधारित हुनुपर्ने बताउनुभयो। उहाँले शान्ति सुरक्षामा प्रहरीसँग सहकार्य गर्दै सुरक्षित समुदाय निर्माणमा नगरपालिका प्रतिबद्ध रहेको स्पष्ट पार्नुभयो।
एसपी हरिहरनाथ योगीले जनताको गुनासो सुन्ने र सुझावलाई कार्यान्वयन प्रक्रियामा यस्ता कार्यक्रमहरू उपयोगी हुने बताउँदै, उदयपुर प्रहरीले नागरिकप्रति उत्तरदायी र जवाफदेही सेवा प्रवाहमा ध्यान दिइरहेको जानकारी दिनुभयो। उहाँले प्रहरी जनशक्ति, अपराध प्रवृत्ति, गस्ती स्थिति, अनुसन्धानका चुनौती तथा सीमित स्रोत र उपकरणको अवस्था बारे पनि अवगत गराउनुभयो। साथै, लागूऔषध, किशोर अपराध तथा महिला र बालबालिका सम्बन्धी हिंसाको नियन्त्रण चुनौतीपूर्ण रहेको उल्लेख गर्दै सामुदायिक प्रहरी संयन्त्र पुनः सक्रिय पार्ने योजना रहेको जानकारी दिनुभयो।
कार्यक्रममा सहभागीहरूले प्रहरी सेवा पारदर्शी, शीघ्र प्रतिक्रिया प्रणालीयुक्त, समावेशी र मानव अधिकारमैत्री हुनुपर्नेमा जोड दिए। उनीहरूले विभिन्न सुझाव, गुनासो र सरोकारका विषयहरू खुला छलफलमार्फत प्रस्तुत गरेका थिए।
कार्यक्रममा नगर उप-प्रमुख, वडा अध्यक्षहरू, विद्यालय तथा स्वास्थ्य क्षेत्रका प्रतिनिधि, सञ्चारकर्मी लगायत सरोकारवाला व्यक्तिहरूको उल्लेखनीय सहभागिता रहेको थियो।
कार्यक्रमको समापनतर्फ नगरप्रमुख कार्कीले शान्ति सुरक्षामा थप सुधार ल्याउन नगरपालिकाको तर्फबाट स्रोत व्यवस्थापन र सहकार्यमा सहयोग गरिने प्रतिबद्धता व्यक्त गर्नुभयो।
