३० बैशाख, बेलका / उदयपुरको बेलका नगरपालिकामा लामो समयदेखिको प्रयासपछि १० शय्याको बेलका नगर आधारभूत अस्पताल निर्माण कार्य अघि बढेको छ। बेलका नगरपालिका वडा नं. ६ स्थित बुद्धचोकमा बुधबार एक कार्यक्रमका बीच अस्पताल भवनको शिलान्यास गरिएको हो।
नगर प्रमुख अशोक कार्कीले हिन्दु परम्पराअनुसार पूजा-आराधना गरी अस्पताल भवनको शिलान्यास गरेका हुन्। कार्यक्रममा बोल्दै नगर प्रमुख कार्कीले निर्माण सम्झौताको अवधि दुई वर्ष भए पनि एक वर्षभित्रै निर्माण सम्पन्न गरी आगामी वैशाख ३० गते अस्पताल उद्घाटन गरिने र नगरवासीलाई स्वास्थ्य सेवा प्रदान गरिने बताए।
कार्यक्रममा वडा नं. ३ र ९ का वडाध्यक्षहरू, विभिन्न वडा सदस्यहरू, प्रमुख प्रशासकीय अधिकृत विनोद भट्टराई लगायत नगरपालिका कर्मचारीहरूको उपस्थिति रहेको थियो।
स्थानीयवासीले अस्पताल निर्माणसँगै बेलकावासीले सहज र गुणस्तरीय स्वास्थ्य सेवा पाउने अपेक्षा गरेका छन्।
