अजम्बर पुलामी –
२९ माघ, बेलका / उदयपुरको बेलका नगरपालिकाले १७औँ नगरसभा अधिवेशन सफलतापूर्वक सम्पन्न गरेको छ।
“सबल आर्थिक, सामाजिक र भौतिक पूर्वाधार-बेलका नगर विकासको प्रमुख आधार” भन्ने मूल नाराका साथ आयोजित अधिवेशनको औपचारिक उद्घाटन नगर प्रमुख अशोक कार्कीले गर्नुभएको थियो।
सभामा नगर उपप्रमुख जिरा राईले मन्तव्यसहित प्रगति प्रतिवेदन प्रस्तुत गर्नुभएको थियो।
अधिवेशनमा कार्यान्वयनमा रहेका विभिन्न कार्यविधिहरूको समीक्षा गर्नुका साथै शिक्षा ऐन, २०८२ पारित गरिएको छ।
यस्तै, खानेपानी, सरसफाइ तथा स्वच्छता व्यवस्थापन सम्बन्धी व्यवस्था र भू-उपयोग क्षेत्र वर्गीकरण सम्बन्धी मापदण्ड, २०८२ नगरसभाबाट सर्वसम्मत रूपमा अनुमोदन गरिएको छ।
त्यसैगरी, कृषि, पशुपन्छी तथा मत्स्य विकास कार्यक्रम सम्बन्धी एकीकृत अनुदान सञ्चालन कार्यविधि, २०८२ लगायतका प्रस्तावहरू पनि सभामा प्रस्तुत गरिएको थियो।
घरजग्गा नक्सा पास दस्तुर संशोधन सम्बन्धी प्रस्तावमाथि छलफल गर्दै आवश्यक निर्णयसमेत गरिएको छ।
नगरसभा सदस्यहरूले उठाएका जिज्ञासाहरूमा नगर प्रमुख कार्कीले जवाफ दिँदै आवश्यक प्रस्तावहरू पारित गरिएको जानकारी दिनुभयो।
नगरसभाले आवश्यक देखिएका विभिन्न विषयमा छलफल गर्दै निर्णयहरू अनुमोदन गरेको हो। अधिवेशनमा प्रमुख प्रशासकीय अधिकृत विनोद भट्टराई, ९ वटै वडाका वडाध्यक्षहरू, नगरसभा सदस्यहरू, कर्मचारीहरु तथा अन्य पदाधिकारीहरूको उपस्थिति रहेको थियो।
अन्त्यमा नगर प्रमुख कार्कीले नीति तथा बजेट सम्बन्धमा मन्तव्य राख्दै १७ औँ नगरसभा अधिवेशन समापन गर्नुभएको थियो।
