अजम्बर पुलामी-
०१ फागुन, बेलका / उदयपुरको बेलका नगरपालिकामा पाँचौँ मेयर कप फुटबल प्रतियोगिता आजदेखि सुरु भएको छ। प्रतियोगिता बेलका-६ स्थित लेकाली रंगशाला खेलमैदानमा सञ्चालन भइरहेको छ।
“सबल आर्थिक, सामाजिक र भौतिक पूर्वाधार-बेलका नगर विकासको प्रमुख आधार” भन्ने मूल नाराका साथ बेलका नगर युवा तथा खेलकुद विकास समितिको आयोजनामा बेलका नगरस्तरीय नकआउट पाँचौँ मेयर कप फुटबल प्रतियोगिता २०८२ सुरु भएको हो। प्रतियोगिताको उद्घाटन नगर प्रमुख अशोक कार्कीले ब्यानर पढ्दै उद्घाटन गर्नुभयो।
उद्घाटन कार्यक्रममा नगर उपप्रमुख जीरा राई, प्रशासकीय अधिकृत रविकिरण आचार्य, बेलका-६ का वडा अध्यक्ष बसन्तकुमार मगर, शिक्षा शाखा प्रमुख हरि कट्टेल तथा विभिन्न राजनीतिक दलका प्रतिनिधिहरूको उपस्थिति रहेको थियो।
प्रतियोगितामा नगरभित्रका ८ वटा वडाका टोलीहरूको सहभागिता रहेको आयोजकले जनाएको छ।
आज भएको उद्घाटन खेलमा बेलका-६ र बेलका-९ बीचको प्रतिस्पर्धा गोलरहित बराबरीमा टुंगिएको थियो। पेनाल्टी सुटआउटमा बेलका-९ ले ५-४ गोल अन्तरले जित निकाल्दै सेमिफाइनलमा स्थान सुरक्षित गरेको छ। खेलको म्यान अफ द म्याच बेलका-९ का जर्सी नम्बर १४ का खेलाडी निर्जोल राई घोषित हुनुभएको छ।
प्रतियोगितामा प्रत्येक खेलको म्यान अफ द म्याचलाई नगद १ हजार रुपैयाँ प्रदान गरिनेछ। उत्कृष्ट गोलकिपर, डिफेन्डर, मिडफिल्डर र सर्वाधिक गोलकर्तालाई जनही २ हजार रुपैयाँ पुरस्कार प्रदान गरिनेछ भने प्रतियोगिताभर उत्कृष्ट तथा सर्वोत्कृष्ट खेलाडीलाई २ हजार ५ सय रुपैयाँ प्रदान गरिनेछ।
प्रतियोगिताको विजेताले नगद ५० हजार रुपैयाँसहित ट्रफी, मेडल र प्रमाणपत्र प्राप्त गर्नेछन् भने उपविजेताले नगद ३० हजार रुपैयाँसहित ट्रफी, मेडल र प्रमाणपत्र प्राप्त गर्नेछन्।
भोलि वडा नम्बर १ र वडा नम्बर ३ बीचको खेल दिउँसो ठीक ३ बजेदेखि सुरु हुनेछ। प्रतियोगिता फागुन ९ गतेसम्म सञ्चालन हुनेछ।
