उदयपुरको बेलका नगरपालिकामा आजदेखि बेलका नगर अन्तर माध्यमिक विद्यालय स्तरीय प्रथम मेयर-उपमेयर रनिङ शिल्ड प्रतियोगिता २०८२ सुरु भएको छ।
“राष्ट्रका लागि खेलकुद, स्वास्थ्यका लागि खेलकुद” भन्ने मूल नाराका साथ बेलका नगरपालिका शिक्षा शाखा साथै युवा तथा खेलकुद विकास समितिको संयुक्त आयोजनामा लेकाली खेल मैदानमा प्रतियोगिता सुरु गरिएको हो।
प्रतियोगितामा बेलका नगरभित्रका २० वटा विद्यालयको सहभागिता रहेको छ। प्रतियोगिताअन्तर्गत शटपुट, लङ जम्प, हाई जम्प, ट्रिपल जम्प, ज्याभलिन थ्रो, भलिबल, कबड्डी, तेक्वान्दो, दौड तथा रिले दौडका खेलहरु समावेश गरिएको छ।
प्रतियोगिताको उद्घाटन बेलका नगरपालिकाका नगरप्रमुख अशोक कार्कीले गर्नुभएको हो। उद्घाटनअघि सहभागी सबै विद्यालयका विद्यार्थीहरुले मार्चपास गरेका थिए।
आजदेखि सुरु भएको प्रतियोगिता पुस १३ गतेसम्म सञ्चालन हुनेछ। प्रतियोगिताका विजेता टोली तथा खेलाडीहरुलाई ट्रफी, मेडल र प्रमाणपत्र प्रदान गरिने आयोजकले जनाएको छ।
शिक्षा शाखा प्रमुख हरि कटेलको अध्यक्षतामा सम्पन्न उद्घाटन कार्यक्रममा उपमेयर जिरा राई, प्रमुख प्रशासकीय अधिकृत विनोद भट्टराई, वडा अध्यक्षहरू बसन्त कुमार मगर, भरत घिमिरे, प्रेम बहादुर दाहाल, विभिन्न राजनीतिक दलका प्रतिनिधि, विद्यालयका प्रधानाध्यापक, शिक्षक तथा खेलप्रेमीहरुको बाक्लो उपस्थिति रहेको थियो।
