भदौ १, बेलका / ब्रदरहुड फुटबल क्लबले वाई वाई दोस्रो बेलका गोल्ड कप फुटबल प्रतियोगिता २०८१ को आय-व्यय विवरण सार्वजनिक गरेको छ।
क्लबका अध्यक्ष रविन तामाङका अनुसार प्रतियोगिताबाट कुल १३ लाख ७२ हजार ५८४ रुपैयाँ आम्दानी भएकोमा सञ्चालन खर्च कटाएर करिब ६९ हजार ४७१ रुपैयाँ बचत भएको छ।
प्रतियोगिताको आम्दानी खर्च सार्वजनिक कार्यक्रममा क्लबले रक्तदान, योग शिविर, विभिन्न क्लबलाई खेल सामाग्री वितरण तथा विपन्न परिवार र खेलाडीलाई आर्थिक, भौतिक र प्राविधिक सहयोग गर्दै आएको जानकारी समेत दिएको छ।
प्रतियोगितामा प्रथम र दोस्रो पुरस्कार राशी १ लाख ६६ हजार ६६६ रुपैयाँ नगदसहित ट्रफी, मेडल र प्रमाणपत्र प्रदान गरिएको थियो। “बेलकाको सान, खेलकुद विकासमा हातेमालो हाम्रो अभियान” भन्ने नाराका साथ कात्तिक ३ गतेदेखि १० गतेसम्म प्रतियोगिता सम्पन्न भएको हो।
