२४ साउन, बेलका / अध्ययन संस्कृतिको प्रवर्द्धन गर्ने उद्देश्यसहित बेलका नगरपालिका २, भागलपुरको बाण्डाडा चौकमा स्थानीय युवाहरूको पहल र बेलका पोस्टको नेतृत्वमा निर्मित ‘परेवा पुस्तकालय’ शनिवार एक कार्यक्रमका बीच समुद्घाटन गरिएको छ।
पुस्तकालय निर्माणका लागि देश-विदेशमा रहेका दाजुभाइ तथा दिदीबहिनीहरूबाट आर्थिक सहयोग संकलन गरिएको थियो। साथै, २०८१ सालको तिहारमा आयोजित कन्सर्टबाट उठेको रकम समेत प्रयोग गरिएको निर्माण समितिले जानकारी दिएको छ। यसमार्फत कुल रू. ६६ हजार ९४८ संकलन भएको हो।
समुद्घाटन समारोहमा प्रमुख अतिथि नगरप्रमुख अशोक कार्की, विशेष अतिथि उपप्रमुख जिरा राई, वडा नं. २ का अध्यक्ष प्रेम बहादुर दाहाल, वडा नं. ३ का अध्यक्ष टंक प्रसाद आचार्य लगायत स्थानीय जनप्रतिनिधि, शिक्षक, विद्यार्थी, समाजसेवी तथा सर्वसाधारणको सहभागिता रहेको थियो।
कार्यक्रममा नगरप्रमुख कार्कीले पुस्तकालयलाई ज्ञान, चेतना र सामाजिक विकासको आधारभूत स्तम्भका रूपमा उल्लेख गर्दै, यसले युवापुस्तामा अध्ययन संस्कृतिको विकासमा ठुलो योगदान पुर्याउने विश्वास व्यक्त गर्नुभयो। निर्माण समितिका अनुसार भविष्यमा छुट्टै भवन निर्माणसहित प्रविधिमैत्री डिजिटल पुस्तकालयको योजना समेत अघि बढाइनेछ।
