चैत्र ३ – बेलका। उदयपुरको बेलका नगरपालिकामा वृहत निःशुल्क योग विज्ञान एबम् स्वास्थ्य जागरण शिविर कार्यक्रम सुरु भएको छ। बेलका ६ बुद्ध चोक खेलमैदानमा आज एक औपचारिक कार्यक्रम बिच उद्घाटन गरि शिविर सुरु भएको हो।
बेलका नगरपालिकाको आयोजना, पतंजली योग समिति उदयपुरको तत्वाधान एवं ब्रदरहुड फुटबल क्लब र बुद्ध एकता फुटबल क्लबको सहयोगमा सुरु भएको योग शिविर चैत्र ९ गते सम्म बिहान ४:३० देखि ६:३० बजेसम्म संचालन हुने त्यसैगरि बालबालिकाहरुको लागि छुट्टै प्रत्येक बेलुकी ५ बजेबाट योग शिविर हुने आयोजकले बताएको छ।
योग शिविर स्वस्थ्यको लागि निकै फाइदाजनक रहेकोले सबैले शिविरमा सहभागी हुनु पर्ने उद्घाटन कार्यक्रमका प्रमुख अतिथि कोशी प्रदेश संसद भीम पराजुली ले बताउनु भयो।
बेलका नगर प्रमुख अशोक कार्कीको अध्यक्षतामा उद्घाटन भएको कार्यक्रममा नगर उप प्रमुख जिरा राई ले योग शिविरको महत्त्व र फाइदा बारे प्रकाश पार्दै स्वागत मन्तव्य राख्नु भएको थियो। कार्यक्रममा ३ नं. वडा अध्यक्ष टंक प्रसाद आचार्य, निमित्त प्रमुख प्रशासकीय अधिकृत रबिकिरण आचार्य, शाखा प्रमुखहरु, विभिन्न राजनीतिक दलका प्रमुख तथा प्रतिनिधिहरु, सुरक्षा निकाय लगायतको करिब २५० जना भन्दा बढीको सहभागीता रहेको ब्रदरहुडका अध्यक्ष रबिन तामाङले बताउनु भयो।
