रमेश तिम्सिना,बेलका । सप्तकोसी नदीको कटान तथा कबुलियती वन क्षेत्रका कारण प्रभावित स्थानीय बासिन्दाहरूको जनगुनासो सुनुवाइ तथा स्थलगत अनुगमन गरिएको छ।
अनुगमनका क्रममा पूर्वमन्त्री डा. नारायण खड्काले प्रभावित क्षेत्रका नागरिकहरूको समस्या सुन्दै तत्काल समाधानका लागि सम्बन्धित निकायको ध्यानाकर्षण गराउनुभएको छ। उहाँले सप्तकोसी कटानको समस्या गम्भीर बन्दै गएको भन्दै नेपाल तथा भारतका सम्बन्धित निकायसँग प्रत्यक्ष फोन सम्पर्क गरी आकस्मिक तटबन्ध निर्माण तथा नदी नियन्त्रणका काम तत्काल अघि बढाउन निर्देशन दिनुभएको बताइएको छ।
विशेषगरी बेलका क्षेत्रका तटीय बासिन्दालाई कबुलियती वनसम्बन्धी कानुनी प्रावधानलाई मात्र आधार बनाएर वर्षौंदेखि बस्दै आएको थातथलोबाट विस्थापित गर्न नहुने डा. खड्काको अडान थियो। उहाँले स्थानीय बासिन्दाको बसोबासको नैसर्गिक अधिकार सुरक्षित हुनुपर्ने बताउनुभएको छ।
पीडित स्थानीयको अधिकार रक्षाका लागि आवश्यक कानुनी परामर्शसहित अन्य सहयोग उपलब्ध गराउन आफू प्रतिबद्ध रहेको उहाँले बताउनुभयो। विपद्को समयमा आफू जनताको सुख–दुःखमा सधैं साथमा रहने र पीडितहरूको न्यायका लागि निरन्तर पहल गर्ने प्रतिबद्धता समेत व्यक्त गर्नुभयो।
सप्तकोसी नदीको निरन्तर कटानका कारण बेलका क्षेत्रका तटीय बस्ती तथा स्थानीयको घरजग्गा जोखिममा पर्दै आएको अवस्थामा पूर्वमन्त्री खड्काको स्थलगत अनुगमन र सम्बन्धित निकायसँगको समन्वयलाई स्थानीयले सकारात्मक रूपमा लिएका छन्।
