३० जेठ, बेलका / उदयपुरको बेलका नगरपालिका-६ स्थित साकेला पार्कमा नगरस्तरीय साकेला कार्यक्रम आज भव्य रूपमा सम्पन्न भएको छ। किरात राई यायोक्खा बेलका नगर कार्यसमितिको आयोजना तथा बेलका-३ र बेलका-६ वडा कार्यसमितिको सहआयोजनामा किराँती राई समुदायको महान चाड उभौली साकेला २०८३ तथा किराँत यलम्बर संवत् ५०८६ को अवसरमा शुभकामना आदानप्रदान कार्यक्रम सम्पन्न भएको हो।
कार्यक्रममा बेलका नगरभित्रका विभिन्न साकेला टोलीसहित छिमेकी स्थानीय तह चौदण्डीगढी नगरपालिकाका टोलीहरू गरी १५ भन्दा बढी साकेला टोलीको सहभागिता रहेको थियो। सहभागी टोलीहरूले परम्परागत साकेला सिली प्रस्तुत गर्दै सांस्कृतिक झाँकी प्रदर्शन गरेका थिए।
सो अवसरमा बेलका नगरपालिकाले किरात राई यायोक्खा बेलका नगर कार्यसमितिलाई २० थान कुर्सी, एक थान साउण्ड सिस्टम तथा एक थान रोस्ट्रम हस्तान्तरण गरेको थियो। त्यस्तै, बेलका-६ वडा कार्यालयले कार्यक्रमका लागि एक लाख रुपैयाँ आर्थिक सहयोग प्रदान गरेको आयोजकले जनाएको छ। विभिन्न व्यवसायी तथा समाजसेवीहरूले समेत नगद सहयोग गरेका थिए।
नगर प्रमुख अशोक कार्कीलाई आयोजकले भव्य स्वागत गरेका थिए। प्रमुख अतिथि कार्कीले पानसमा दीप प्रज्वलन गरी तथा ब्यानर वाचन गर्दै कार्यक्रमको उद्घाटन गरेका थिए। कार्यक्रममा किरात राई यायोक्खा बेलका नगर कार्यसमितिका कोषाध्यक्ष विश्व राईले स्वागत मन्तव्य व्यक्त गरेका थिए भने सहयोगी व्यक्ति तथा संस्थाहरूलाई मायाको चिनो प्रदान गरिएको थियो।
कार्यक्रममा सहभागी प्रत्येक साकेला टोलीलाई बेलका-६ का वडा अध्यक्ष वसन्त कुमार मगरले एक/एक थान झ्याम्टा हस्तान्तरण गरेका थिए।
कार्यक्रमको अध्यक्षता किरात राई यायोक्खा बेलका नगर कार्यसमितिकी अध्यक्ष रेनुका राईले गरेकी थिइन्।
कार्यक्रममा बेलका नगरपालिकाका नगर प्रमुख अशोक कार्की, बेलका–६ का वडा अध्यक्ष वसन्त कुमार मगर, बेलका-५ का वडा अध्यक्ष दीपकराज रेग्मी, बेलका-९ का वडा अध्यक्ष भरत घिमिरे, जनप्रतिनिधि, सुरक्षाकर्मी, विभिन्न राजनीतिक दलका प्रतिनिधि, संघसंस्थाका प्रतिनिधि, समाजसेवी, बुद्धिजीवी तथा संस्कृति प्रेमीहरूको उपस्थिति रहेको थियो।
उभौली साकेला चार्डको संरक्षण, प्रवर्द्धन तथा नयाँ पुस्तामा सांस्कृतिक चेतना अभिवृद्धि गर्ने उद्देश्यले आयोजित कार्यक्रमले किराँती समुदायको मौलिक संस्कृति जगेर्ना गर्न महत्वपूर्ण योगदान पुर्याएको आयोजकले जनाएको छ। कार्यक्रम सञ्चालन सहसचिव कविता राईले गरेकी थिइन् ।
