जेठ १९, उदयपुर । बेलका नगरपालिकाको शिक्षा शाखाको सहयोग तथा सहारा सामुदायिक अध्यन केन्द्र, बेलका–१ आम्वासीको आयोजनामा १० दिने मखमलको जुत्ता तथा
सिलफर चप्पल बनाउने तालिम आजदेखि सुरु भएको छ।
“सीप सिकौं, स्वरोजगार बनौं” भन्ने नारा सहित सञ्चालन गरिएको तालिमको एक औपचारिक कार्यक्रमका बीच उदघाटन गरिएको हो। कार्यक्रमको अध्यक्षता टिकाराज तामाङले गर्नुभएको थियो भने प्रमुख अतिथिका रूपमा बेलका नगरपालिका वडा नं. १ का वडाध्यक्ष दिनेश्वर प्रसाद चौधरीको उपस्थिति रहेको थियो।
उदघाटन कार्यक्रममा जनप्रतिनिधि, समाजसेवी, पत्रकार तथा स्थानीय सरोकारवालाहरूको समेत सहभागिता रहेको थियो। तालिममा एक जना प्रशिक्षक सहित १५ जना प्रशिक्षार्थीहरूको सहभागिता रहेको आयोजकले जनाएको छ।
आयोजकका अनुसार तालिमबाट सहभागीहरूले जुत्ता तथा चप्पल निर्माण सम्बन्धी व्यावहारिक सीप हासिल गरी स्वरोजगार तथा आयआर्जनका अवसर सिर्जना गर्न सक्ने अपेक्षा गरिएको छ।
बेलका १ को आम्वासीमा आयोजित कार्यक्रमको सन्चालन सहारा सामुदायिक अध्यन केन्द्रका परिचालिका रेनुका राईले गर्नुभएको थियो ।
