अजम्बर पुलामी-
१७ मंसिर, बेलका / उदयपुरको बेलका नगरपालिका–९, रामपुर बजारमा कोरियन भाषा कक्षा सञ्चालन गरिएको छ। उरि हाक्वन ल्याङ्ग्वेज इन्स्टिच्युट, धरानले साउन महिनादेखि आफ्नो शाखा विस्तार गर्दै रामपुरमा नियमित कक्षा सुरू गरेको हो।
रामपुर शाखा प्रबन्धक तथा भाषा प्रशिक्षक जितेन्द्र राईका अनुसार कोरियन भाषा सिक्ने इच्छा भए पनि घरायसी तथा आर्थिक कारणले टाढा जान नसकेर वञ्चित भइरहेका ग्रामीण क्षेत्रका विद्यार्थीलाई लक्षित गर्दै यहाँ शाखा खोलिएको हो। उनका अनुसार दक्ष र अनुभवी प्रशिक्षकमार्फत विद्यार्थीको तह अनुसार छुट्टाछुट्टै कक्षा सञ्चालन भइरहेको छ। इन्टिच्युटले आफ्नै पाठ्यपुस्तक तथा सहयोगी सामग्रीको माध्यमबाट बेसिक तहदेखि अध्यापन गराइने र दैनिक टेस्ट क्लासमार्फत विद्यार्थीको प्रगति मूल्यांकन गरिने बताइएको छ।
आवश्यक परामर्श, अतिरिक्त कक्षा तथा आवश्यक सामग्रीको समेत व्यवस्था गरिएको छ।
स्थानीय विद्यार्थीले गाउँमै कक्षा सञ्चालन भएपछि घरायसी जिम्मेवारीसँगै सहज रूपमा सिक्न पाइएको प्रतिक्रिया दिएका छन्। उनीहरूको भनाइमा, “हामी जस्ता ग्रामीण क्षेत्रका विद्यार्थीलाई आफ्नै ठाउँमा सिक्न पाउँदा धेरै सहज भयो।”
ईपीएस टपिक परीक्षालाई लक्षित गर्दै विद्यार्थीले सामना गर्न सक्ने सम्भावित चुनौतीलाई सम्बोधन गर्ने उद्देश्यले दैनिक मोडेल टेस्ट लिइने र अन्तिम तयारी कक्षाको समेत व्यवस्था गरिने प्रशिक्षक राईले बताए। उनले सबै इच्छुक विद्यार्थीलाई अवसरको पूर्ण उपयोग गर्न आग्रह गरे।
