२६ असार, बेलका / उदयपुर जिल्लाको बेलका नगरपालिका -३ स्थित बुद्धचोकमा गौतम बुद्धको मूर्ति अनावरण गरिएको छ। बिहीवार एक विशेष समारोहबीच बेलका नगरप्रमुख अशोक कार्कीले मूर्तिको पर्दा उघारेर अनावरण गरेका हुन् ।
विगत केही महिनादेखि निर्माण कार्यमा रहेका २ फिट अग्लो बुद्ध मूर्ति निर्माण कार्य वडा नं -३ को २ लाख रुपैयाँ लागतमा सम्पन्न भएको हो । वडाध्यक्ष टंकप्रसाद आचार्यका अनुसार, सडक निर्माणको क्रममा पहिलेको मूर्ति क्षति पुगेपछि मूर्ति निर्माण समितिको पहलमा पुनः निर्माण गरिएको हो ।
अनावरण कार्यक्रममा कार्यपालिका सदस्य, विभिन्न राजनीतिक दलका प्रतिनिधिहरू, समाजसेवी, बुद्धिजीवी, सञ्चारकर्मी तथा स्थानीय नागरिकहरूको उपस्थिति रहेको थियो ।
