२४ असार, बेलका / बेलका नगरपालिका–४, गुरुङ्गचौरीमा अवस्थित श्री जनता नमुना माध्यमिक विद्यालयमा “गरिब जेहेन्दार विद्यार्थी छात्रवृत्ति कोष” स्थापनाका लागि वैदेशिक रोजगारीमा रहनुभएका भक्तबहादुर बिष्टद्वारा रु. १,०१,१११रुपैयाँ अक्षरेपी एक लाख एक हजार एकसय एघार रुपैयाँ आर्थिक सहयोग प्रदान गरिएको छ।
स्व. बुबा लालबहादुर बिष्ट र ससुरा स्व. तिलकबहादुर बस्नेतको पुण्यतिथिको अवसरमा भक्तबहादुर बिष्टले स्व. बुबाको नाममा रु. ५०,५५६ रुपैयाँ र ससुराको नाममा रु. ५०,५५५ रुपैयाँ गरी कुल रकम विद्यालयलाई प्रदान गर्ने प्रतिबद्धता जनाउनु भएको हो।
विद्यालय परिवारले यस महान कार्यको लागि दानवीर बिष्टलाई हार्दिक आभार प्रकट गर्दै यस्ता सहयोगी मनहरुबाट प्रेरणा मिल्ने विश्वास व्यक्त गरेको छ। विद्यालयमा हालसम्म छात्रवृत्ति कोषमा योगदान गर्ने अन्य सहयोगी दाताहरुमा अर्जुन काजी गुरुङ्ग रु. २,४८,५०१ रुपैयाँ र बालकृष्ण गौतम रु. १५,५०१ रुपैयाँ प्रधानाध्यापक सम्मर राईको जन्मदिनको अवसरमा रहेका छन्।
विद्यालय परिवारले अन्य सहयोगी मनहरुलाई पनि यस पुण्य कार्यमा सहभागी हुन हार्दिक अनुरोध गरेको छ।
