२३,साउन बेलका / जिल्लाका दुर्गम क्षेत्रमा लुकेका गायन प्रतिभाहरूको पहिचान र प्रवर्द्धन गर्ने उद्देश्यसहित आयोजित उदयपुर आइडल सिजन-२ को अडिसन बेलका नगरपालिका-९ रामपुरबाट सुरु भएको छ।
रामपुर बजारस्थित सिटी हलमा सम्पन्न अडिसनमा ५ जना सहभागी भएका थिए, जस सबैजना दोस्रो चरणका लागि छनोट भएका छन्। छनोट हुनेहरूमा वडा नम्बर ८ कोठुका मधुराज राई, वडा नम्बर ७ मैनामैनीकी करिना राई, बेलकाका धिरज राई, वडा नम्बर ४ लालबजारकी गृस्मा घिमिरे, बेलकाका सन्तोष राई र वडा नम्बर ५ सुपाडेका सुदिप बिष्ट रहेका छन्।
निर्णायकमा ससिचन्द्र राई र पुजा क्याप्छाकी मगर रहे। अर्को अडिसन चौदण्डीगढी नगरपालिका बेल्टारस्थित USD डान्स स्टुडियोमा साउन २४ गते शनिबार हुने छ।
प्रतियोगिता अडिसन राउन्डदेखि थिएटर राउन्ड, टप २०, गाला, सेमिफाइनल हुँदै ग्राण्ड फिनालेसम्म सञ्चालन हुनेछ। विजेताले १ लाख रुपैयाँ नगदसहित ट्रफी र प्रमाणपत्र, फर्स्ट रनरअपले ५० हजार नगदसहित ट्रफी र प्रमाणपत्र तथा सेकेन्ड रनरअपले २० हजार नगदसहित ट्रफी र प्रमाणपत्र पाउनेछन्।
उदयपुर कलाकार समाजको आयोजनामा भएको सो प्रतियोगिताबारे अध्यक्ष तथा कार्यक्रम संयोजक अशोक सिवाले जानकारी दिनुभयो।
