असार २, बेलका । बेलका ८ को छैठौं नकाउट पुरुष वडाध्यक्ष कप फुटबल प्रतियोगिता २०८३ को उपाधि पन्चकन्या फुटबल क्लबले चुम्न सफल भएको छ। वडा नं ८ स्थित डुम्रीबोटे खेलमैदानमा पन्चकन्या फुटबल क्लब र रियल डुम्रीबोटे फुटबल क्लब बिच फाईनल खेल भएको थियो। खेलमा रियल डुम्रीबोटे फुटबल क्लबका तर्फबाट जर्सी नं ३ का रोशन श्रेष्ठले मध्यान्तर अगाडी १ गोल गर्दै टिमलाई अग्रता दिलाएका थिए तर मध्यान्तर पछी पन्चकन्या फुटबल क्लबका तर्फबाट जर्सी नं १७ का प्रबिन राईले १ गोल गर्दै खेललाई बराबरी बनाएका थिए। निर्धारित समय भित्र १-१ गोलको बराबरी भए पछी खेल पेनाल्टी सुट आउटमा पुगेको थियो। पेनाल्टी सुट आउट बाट पन्चकन्याले ५-४ गोल अन्तरले रियल डुम्रीबोटे लाई पछाडी पार्दै उपाधी रक्षा गर्न सफल भएको हो।
वडा नं ८ को युवा तथा खेलकुद बिकास समितीको अध्यक्ष जोशन राईको अध्यक्षतामा भएको कार्यक्रमको प्रमुख अतिथि वडा नं ८ का वडा अध्यक्ष जयकुमार राई रहनुभएको थियो। कार्यक्रममा वडाका जनप्रतिनिधि, समाजसेवी, बुद्दिजिबी, सुरक्षाकर्मी, पत्रकारहरुको सहभागिता रहेको थियो।
कार्यक्रम लाई सम्बोधन गर्ने क्रममा खेलकुदले आन्तरिक पर्यटन प्रबर्द्दन गर्ने साथै युवाहरुले जुन सुकै प्रकारको खेलकुद भए पनि उचित प्रपोजल ल्याएमा सहयोग गर्ने प्रमुख अतिथि जय कुमार राईले बताउनु भयो।
बिजेता पन्चकन्या फुटबल क्लबले नगद रु. २५,०००/- सहित ट्रफी,मेडल भने उप बिजेता रियल डुम्रीबोटे फुटबल क्लबले नगद रु. १५,०००/- सहित ट्रफी, मेडल प्राप्त गरेका छन। बिधागत पुरस्कार तर्फ हाई स्कोरर यलम्बर फुटबल क्लबका समिर राई र रियल डुम्रीबोटे फुटबल क्लबका अमन थापा मगरले प्राप्त गरेका छन। दुवै जनाले खेल अवधिभर समान ३-३ गोल गरेका थिए। त्यसै गरी बेस्ट मिडफिल्डर पन्चकन्या फुटबल क्लबका निराजन राई, उत्कृष्ट गोलकिपर पन्चकन्या फुटबल क्लबका किशोर राई, बेस्ट प्लेयर रियल डुम्रीबोटे फुटबल क्लबका अमन थापा मगर, बेस्ट डिफेन्डर रियल डुम्रीबोटे फुटबल क्लबका रोशन श्रेष्ठ र आजको खेलको म्यान अफ म्याच पन्चकन्या फुटबल क्लबका खेलाडी दिवश राईले प्राप्त गरेका छन।
