१ असार, बेलका / बेलका नगरपालिकाका नगरप्रमुख श्री अशोक कार्की ज्यूले स्थानीय युवाहरूले बुझाउनुभएको विद्युत् समस्या समाधान सम्बन्धी ध्यानाकर्षण पत्र ग्रहण गर्दै बेलका नगरपालिकामा देखिँदै आएको विद्युत् समस्याको दीर्घकालीन समाधानका लागि आवश्यक पहल भइरहेको जानकारी गराउनुभएको छ।
ध्यानाकर्षण पत्र प्राप्त भएलगत्तै सम्बन्धित निकायमा आवश्यक पत्राचार गरी समस्या समाधानका लागि प्रक्रिया अगाडि बढाइएको व्यहोरा समेत नगरपालिकाले जनाएको छ।
यसै सन्दर्भमा नगरप्रमुख कार्कीले नेपाल विद्युत् प्राधिकरणका केन्द्रीय प्रबन्ध निर्देशक (एमडी) श्री दीर्घायु कुमार श्रेष्ठ ज्यूलाई गत जेठ २४ गते भेट गरी बेलका नगरपालिकामा देखिएको विद्युत् समस्याको स्थायी समाधानका लागि आवश्यक पहल गर्न आग्रह गर्नुभएको थियो। उक्त भेटका क्रममा सम्बन्धित निकायबाट समस्या समाधानका लागि सकारात्मक पहल गर्ने प्रतिबद्धता व्यक्त भएको जानकारी पनि नगरप्रमुखले दिनुभएको छ।
बेलकावासीले लामो समयदेखि भोग्दै आएको विद्युत् समस्याको दीर्घकालीन समाधानका लागि सम्बन्धित निकायहरूसँग आवश्यक समन्वय र सहकार्य गर्दै काम भइरहेको नगरपालिकाले जनाएको छ।
विद्युत् सेवा बेलकावासीको दैनिक जीवन, कृषि, उद्योग, व्यवसाय तथा समग्र विकास निर्माणसँग प्रत्यक्ष जोडिएको महत्वपूर्ण विषय भएकाले स्थानीय सरकारले यसलाई उच्च प्राथमिकतामा राख्दै स्थायी समाधानका लागि प्रतिबद्ध रहेको नगरप्रमुख कार्कीले बताउनुभएको छ।
केही सामाजिक सञ्जालमा नगरप्रमुखको भूमिकाबारे नकारात्मक टिप्पणीहरू देखिएको सन्दर्भमा सत्यतथ्य बुझेर मात्र सूचना सम्प्रेषण गर्न तथा भ्रम सिर्जना हुने गतिविधिबाट जोगिन सम्बन्धित सबैमा अनुरोध गरिएको छ।
विद्युत् समस्या समाधान जस्तो साझा सरोकारको विषयमा सबै पक्षले सकारात्मक सहजीकरण गर्दै रचनात्मक सहयोग गर्नुपर्ने आवश्यकता औँल्याउँदै नगरपालिकाले बेलकावासीलाई धैर्यतापूर्वक साथ दिन आग्रह गरेको छ।
