३१ जेठ, बेलका / उदयपुरको बेलका नगरपालिकामा प्रथम स्वर्गीय नवीन राई भलिबल स्मृति कप २०८३ प्रतियोगिता सुरु भएको छ। बेलका नगरपालिका युवा तथा खेलकुद विकास समितिले स्वर्गीय नवीन राईको स्मृतिमा आयोजना गरेको बेलका नगरस्तरीय भलिबल प्रतियोगिताको आज औपचारिक शुभारम्भ गरिएको हो।
प्रतियोगिताको उद्घाटन बेलका नगरपालिकाका नगर प्रमुख अशोक कार्कीले गर्नुभएको थियो। कार्यक्रममा बेलका नगर युवा तथा खेलकुद समितिका अध्यक्ष गोपिलाल राईको अध्यक्षता रहेको थियो।
आयोजकका अनुसार प्रतियोगितामा बेलका नगरभित्रका १२ वटा टोलीको सहभागिता रहेको छ। प्रतियोगिता भोलिसम्म सञ्चालन हुनेछ। प्रतियोगितामा प्रथम र द्वितीय हुने टोलीले क्रमशः नगद २५ हजार रुपैयाँ र १५ हजार रुपैयाँ, साथै कप, मेडल तथा प्रमाणपत्र प्राप्त गर्नेछन्।
बेलका नगर युवा तथा खेलकुद समितिका अध्यक्ष गोपिलाल राईले स्वर्गीय नवीन राईको योगदानको सम्मान र सम्झनाका लागि प्रतियोगिताको आयोजना गरिएको बताउनुभयो। उहाँले भन्नुभयो, “नवीन हामीमाझ नभए पनि उहाँले खेलकुद क्षेत्रमा पुर्याउनुभएको योगदानलाई सम्मान गर्न यो प्रतियोगिताको आयोजना गरेका हौँ। अहिले सुरुवात गरेका छौँ, आगामी दिनमा पनि यसलाई निरन्तरता दिनेछौँ।”
स्वर्गीय नवीन राई बेलका नगर युवा तथा खेलकुद समितिका पूर्व भलिबल संयोजक हुनुका साथै बेलका नेटवर्कद्वारा सञ्चालित बेलका एफएम १००.९ मेगाहर्जका शेयर सदस्य समेत रहनुभएको थियो।
उहाँको २०८२ साल जेठ ३१ गते सडक दुर्घटनामा परी निधन भएको थियो। उहाँको स्मृतिमा आयोजित यस प्रतियोगिताले खेलकुदमार्फत उहाँप्रति सम्मान व्यक्त गर्नुका साथै युवापुस्तामा खेलप्रतिको आकर्षण बढाउने विश्वास गरिएको छ।
