२९ जेठ, बेलका / उदयपुरको बेलका नगरपालिका-९ भचुवामा किरात राई समुदायको मौलिक सांस्कृतिक पर्व उभौली साकेला २०८३ तथा यलेदोङ ५०८६ को शुभ अवसरमा शुभकामना आदान-प्रदान कार्यक्रम सम्पन्न भएको छ। कार्यक्रमकै अवसरमा भचुवा साकेला सांस्कृतिक उत्थान समिति बेलका-९ भचुवा द्वारा निर्माण गरिएको सांस्कृतिक गेटको उद्घाटन गरिएको छ।
निर्माण सम्पन्न भएको उक्त गेटको उद्घाटन बेलका नगरपालिकाका नगरप्रमुख अशोक कार्की ले गरेका हुन्। नगरप्रमुख कार्कीको प्रमुख आतिथ्यता तथा स्याम कुमार राई को अध्यक्षतामा सम्पन्न कार्यक्रममा बेलका नगरपालिका-९ का वडा अध्यक्ष भरत घिमिरे, स्थानीय समाजसेवी, बुद्धिजीवी, समुदायका अगुवा तथा स्थानीयवासीहरूको उपस्थिति रहेको थियो।
कार्यक्रममा किरात राई समुदायको मौलिक संस्कार, संस्कृति तथा पहिचानको संरक्षण र प्रवर्द्धनका विषयमा छलफल गरिएको थियो। साथै स्थानीय ९३ वर्षीया कान्छीमाया राई लाई नगरप्रमुख अशोक कार्की र वडा अध्यक्ष भरत घिमिरेको हातबाट सम्मान गरिएको थियो। उहाँको दीर्घ अनुभव, सांस्कृतिक योगदान तथा समुदायप्रतिको भूमिकाको कदर गर्दै सम्मान प्रदान गरिएको आयोजकले जनाएको छ।
उभौली साकेला पर्वले सामाजिक एकता, आपसी सद्भाव तथा सांस्कृतिक पहिचानलाई थप मजबुत बनाउने विश्वास सहभागीहरूले व्यक्त गरेका थिए। कार्यक्रमले किरात राई समुदायको सांस्कृतिक संरक्षणमा महत्वपूर्ण योगदान पुग्ने अपेक्षा गरिएको छ।
