अजबर पुलामी-
१५ जेठ, बेलका / उदयपुर जिल्लाको बेलका नगरपालिकामा प्रथम जिल्ला स्तरीय मेयर-उपमेयर ब्याडमिन्टन कप २०८३ प्रतियोगिता सुरु भएको छ। बेलका ब्याडमिन्टन क्लब रामपुरको आयोजना, बेलका नगरपालिका को मुख्य सहयोग, बेलका नगर खेलकुद विकास समितिको सह-आयोजना तथा सरस्वती डेन्टल केयर सेन्टर प्रालि को प्रायोजनमा प्रतियोगिता सञ्चालन गरिएको हो।
बेलका-९ भचुवा स्थित कभर्डहलमा आयोजित प्रतियोगिताको उद्घाटन नगर प्रमुख अशोक कार्की र उपप्रमुख जिरा राईले संयुक्त रूपमा पानसमा बत्ती बालेर तथा ब्यानर पढेर उद्घाटन गर्नुभएको थियो। प्रतियोगितामा विभिन्न स्थानबाट आएका १२८ जना खेलाडी सहभागी रहेको क्लबका अध्यक्ष खड्ग पाखृन ले जानकारी दिनुभयो।
उद्घाटन कार्यक्रममा बोल्दै मेयर कार्कीले गणतन्त्र दिवसको अवसरमा देशका लागि जीवन उत्सर्ग गर्ने ज्ञात-अज्ञात सहिदप्रति श्रद्धाञ्जली व्यक्त गर्नुभयो। उहाँले बेलकाको पहिचान खेलकुदमार्फत स्थापित गर्न विभिन्न विधाका खेलकुद प्रतियोगिता सञ्चालन भइरहेको बताउनुभयो।
प्रतियोगिताअन्तर्गत मेन्स डबल “B” समूहमा प्रथम, द्वितीय र तृतीय हुने टोलीलाई क्रमशः दुईजनालाई जनही २० हजार, दुईजनालाई जनही १५ हजार र चारजनालाई जनही १० हजार रुपैयाँ नगद पुरस्कार प्रदान गरिनेछ। डबल भेट्रान्स ४५ प्लस मेन्सतर्फ प्रथम, द्वितीय र तृतीयलाई क्रमशः दुईजनालाई जनही १२ हजार, दुईजनालाई जनही १० हजार र चारजनालाई जनही ८ हजार रुपैयाँसहित सिल्ड र मेडल प्रदान गरिने आयोजकले जनाएको छ।
त्यसैगरी मेन्स डबल युवा समूहमा प्रथम, द्वितीय र तृतीय हुनेलाई क्रमशः दुईजनालाई जनही ५ हजार, दुईजनालाई ४ हजार र चारजनालाई जनही ३ हजार रुपैयाँ प्रदान गरिनेछ भने सुपर भेट्रान्स ५० प्लस डबल्सतर्फ प्रथम, द्वितीय र तृतीयलाई क्रमशः दुईजनालाई जनही ८ हजार, दुईजनालाई ६ हजार र चारजनालाई जनही ४ हजार रुपैयाँसहित सिल्ड तथा मेडल प्रदान गरिनेछ।
यसैबीच, बेलका-९ भचुवास्थित बेलकाको एक मात्र ब्याडमिन्टन कभर्डहलको पनि मेयर अशोक कार्की र उपमेयर जिरा राईले संयुक्त रूपमा उद्घाटन गर्नुभएको छ। कार्यक्रममा राई समुदायको साकेला सिली नृत्य झाँकी समेत प्रदर्शन गरिएको थियो।
कार्यक्रममा प्रमुख प्रशासकीय अधिकृत बिनोद भट्टराई, इलाका प्रहरी कार्यालय कटारीका प्रमुख लोकमान श्रेष्ठ, वडा नं. ९ का अध्यक्ष भरत घिमिरे, वडा नं. ६ का अध्यक्ष बसन्त कुमार मगर, बेलका नगर युवा तथा खेलकुद विकास समितिका अध्यक्ष गोपिलाल राई, नेकपा एमाले बेलका नगर कमिटी अध्यक्ष हिराजङ्ग राई, बेलका उद्योग वाणिज्य संघका अध्यक्ष चन्द्र शेखर मण्डल, बेलका बिर्च रिसोर्ट सञ्चालक रमन भट्टराई लगायत समाजसेवी, बुद्धिजीवी तथा खेलप्रेमीहरूको उपस्थिति रहेको थियो।
