अजम्बर पुलामी-
२९ बैशाख, बेलका / बेलका नगरपालिका द्वारा आर्थिक वर्ष २०८२/०८३ को सार्वजनिक सुनुवाइ कार्यक्रम आज सम्पन्न गरिएको छ। नगरपालिकाको सभाहलमा आयोजित कार्यक्रममा नगरले प्रवाह गरिरहेका सेवाको अवस्थाबारे गरिएको सर्वेक्षणको नतिजा प्रारम्भमै प्रस्तुत गरिएको थियो।
कार्यक्रममा नगरवासी, सरोकारवाला तथा विभिन्न वडाबाट सहभागी भएका नागरिकहरूले सेवा प्रवाह, शिक्षा, प्रशासन, अनुगमन तथा विकास निर्माणसँग सम्बन्धित गुनासा, जिज्ञासा र सुझावहरू राखेका थिए।
कार्यक्रममा उठाइएका प्रश्नहरूको विषयगत रूपमा सम्बन्धित शाखा प्रमुख तथा जनप्रतिनिधिहरूले जवाफ दिएका थिए। प्रशासनसँग सम्बन्धित जिज्ञासाको जवाफ प्रमुख प्रशासकीय अधिकृत विनोद भट्टराईले दिएका थिए भने शिक्षा क्षेत्रसँग सम्बन्धित प्रश्नहरूको उत्तर शिक्षा अधिकृत हरि कट्टेलले दिएका थिए। त्यसैगरी अनुगमन, योजना कार्यान्वयन तथा विकास निर्माणसम्बन्धी प्रश्नहरूको जवाफ उपमेयर जिरा राईले दिएका थिए।
कार्यक्रमको अन्तिम चरणमा नगर प्रमुखले समग्र विषयमा धारणा राख्दै नगरपालिकाले सेवा प्रवाहलाई थप प्रभावकारी, पारदर्शी र जनउत्तरदायी बनाउने प्रतिबद्धता व्यक्त गरेका छन्। कार्यक्रममा वडा नं. १ र वडा नं. ३ का वडा अध्यक्षहरूले समेत आफ्नो वडामा सञ्चालन भइरहेका गतिविधि, विकास निर्माणका काम तथा नागरिकले उठाएका प्रश्नहरूको जवाफ दिएका थिए।
स्थानिय सरकार सञ्चालन ऐन २०७४ अनुसार नगरपालिकाले एक आर्थिक वर्षमा त्रैमासिक रूपमा ४ पटक सार्वजनिक सुनुवाइ गर्नुपर्ने व्यवस्था उल्लेख गरिएको छ। तर बेलका नगरपालिकामा यो आर्थिक वर्षमा पहिलो पटक मात्र उक्त कार्यक्रम आयोजना गरिएको हो।
