बैशाख १६, बेलका । उदयपुरको बेलका नगरपालिकामा वडा नं १ मा पुरन्दह स्थित जनता बेलका माध्यमिक बिधालयको निर्माण सम्पन्न भवनको गुणस्तरमाथि चासो बढ्दै गएको छ। भारतीय सहयोग र बेलका नगरपालिकाको साझेदारीमा निर्माण भएको पुरन्दहस्थित विद्यालय भवनको ढलान चर्किएको पाइएपछि उपमेयर सहितको टोलिले स्थलगत अनुगमन गरेको हो।
बेलका नगरपालिकाका उपमेयर जिरा राईको आधिकारिक फेसबुक पेजमा उल्लेख गरिएको छ,स्थानीय बुद्धिजीवी, इन्जिनियर, प्राविधिक, विद्यालय परिवार तथा विद्यालय व्यवस्थापन समितिका अध्यक्ष लगायतको उपस्थितिमा गरिएको अनुगमनपछि चर्किएको ढलान फुटाई पुनःनिर्माण कार्य सुरु गरिएको हो।
इन्जिनियर नबिन कौशलका अनुसार केही प्राविधिक कमजोरीका कारण यस्तो समस्या देखिएको हो। निर्माण कम्पनीले उक्त कमजोरीलाई सच्याउँदै मापदण्डअनुसार पुनःनिर्माण गर्ने प्रतिबद्धता जनाएको छ।
यसैबीच, बेलका नगरपालिका वडा नम्बर २ स्थित सप्तकोशी माध्यमिक विद्यालय, भागलपुरमा निर्माणाधीन भवन र प्रयोग भइरहेका कच्चा पदार्थको गुणस्तरको पनि अनुगमन गरिएको छ।
