२८ चैत, बेलका / उदयपुर जिल्लाको बेलका नगरपालिका-८ बोप्ताङमा कोशी प्रदेश स्तरीय प्याराग्लाइडिङ प्रतियोगिता सफलतापूर्वक सम्पन्न भएको छ। साहसिक खेलका रूपमा परिचित प्याराग्लाइडिङ उडानका लागि पूर्वी नेपालकै चर्चित गन्तव्य बन्दै गएको बोप्ताङमा उक्त प्रतियोगिता चैत २६ र २७ गते दुई दिनसम्म सञ्चालन गरिएको थियो।
नेपाल प्याराग्लाइडिङ तथा ह्याङ्ग्ल्याइडिङ संघ जिल्ला समिति उदयपुरको आयोजनामा तथा कोशी प्रदेश पर्यटन कार्यालय धरानको आर्थिक सहयोगमा सम्पन्न प्रतियोगितामा ४ विदेशीसहित ४५ जना पाइलटहरूको सहभागिता रहेको थियो। सहभागीहरूले बोप्ताङबाट कुल २८० वटा उडान भर्दै कोशी टप्पु वन्यजन्तु आरक्ष र सप्तकोसी नदी क्षेत्रको मनोरम दृश्य अवलोकन गरेका थिए।
प्रतियोगिता प्याराग्लाइडिङ एक्युरेसी विधामा आधारित रहेको थियो, जसमा पाइलटहरूले हावामा उडान भरेर जमिनमा तोकिएको निश्चित बिन्दुमा कति सटिक रूपमा अवतरण गर्न सक्छन् भन्ने आधारमा प्रतिस्पर्धा गराइएको थियो। प्रत्येक पाइलटले अधिकतम ८ पटकसम्म उडान भर्ने व्यवस्था गरिएको थियो।
प्रतियोगितामा ३५ प्रतिस्पर्धीमध्ये नेपालका एक र एक भारतीय पाइलटले समान ४४ अंक प्राप्त गर्दै संयुक्त रूपमा प्रथम स्थान हासिल गरेका छन्।
बेलका नगरपालिकाका नगरप्रमुख अशोक कार्कीको प्रमुख आतिथ्यतामा सम्पन्न यस कार्यक्रमले बेलकालाई साहसिक पर्यटनको एक महत्वपूर्ण गन्तव्यको रूपमा स्थापित गर्ने दिशामा सकारात्मक सन्देश प्रवाह गरेको छ।
