भदौ १०, बेलका / उदयपुरको बेलकामा तीज विशेष शुभकामना आदान-प्रदान तथा मनोरञ्जनात्मक एकल नृत्य प्रतियोगिता भव्य रूपमा सम्पन्न भएको छ।
बेलका उद्योग वाणिज्य संघको आयोजनामा भएको सो कार्यक्रममा बेलका नगरपालिका उपमेयर जिरा राईको प्रमुख आतिथ्यता रहेको थियो। वडानं ९ र विभिन्न सहयोगी संस्थाहरुको सहयोगमा सम्पन्न कार्यक्रममा १६ जना महिलाले नृत्य प्रतियोगितामा सहभागिता जनाएका थिए।
प्रतियोगितामा पहिलो, दोस्रो र तेस्रो हुने महिला सहभागीलाई प्रमुख अतिथि उपमेयर राईले पुरस्कार प्रदान गर्नुभयो। उक्त पुरस्कार बेलका उद्योग वाणिज्य संघका अध्यक्ष तथा चन्द्रमणी ज्वेलर्सका सञ्चालक चन्द्रमणी मण्डलले सहयोग गर्नुभएको हो।
कार्यक्रममा महिला जनप्रतिनिधि र महिला नेतृहरूको पनि विशेष आतिथ्यता रहेको थियो। कार्यक्रममा बाणिज्य संघकी सदस्य थिरकुमारी ढुङ्गानाले अध्यक्षता गर्नुभएको थियो।
उपमेयर जिरा राईले उपस्थित सम्पूर्णलाई तीजको शुभकामना दिँदै महिला सशक्तिकरणका यस्ता कार्यक्रमले समाजमा सकारात्मक प्रभाव पार्ने विश्वास व्यक्त गर्नुभयो।
